Búgin, 11-aprel kúni Ájiniyaz atındaǵı Nókis mámleketlik pedagogikalıq institutında ulıwma bilim beriw mektepleriniń 10-11-klass oqıwshıları arasında rus tili boyınsha II Gubkin pán olimpiadası baslandı.

Olimpiada I.M.Gubkin atındaǵı Rossiya mámleketlik neft hám gaz universitetiniń Tashkent qalasındaǵı filialı tárepinen shólkemlestirilgen bolıp, respublika boylap qábiletli jaslardı anıqlaw, olardıń intellektual potencialın rawajlandırıw, mektep hám joqarı bilimlendiriw sisteması arasındaǵı birge islesiwdi bekkemlewge xızmet etedi.

Pán olimpiadası bir waqıttıń ózinde eki aymaqta – Nókis hám Tashkent qalalarında ótkerilmekte. Bul format qatnasıw geografiyasın keńeytiw hám respublikanıń túrli aymaqlarınan oqıwshılardıń qatnasın támiyinlew imkaniyatın berdi.

Bıyıl pán olimpiadasında Ózbekstannıń 11 aymaǵınan 1300 den aslam, sonıń ishinde, Qaraqalpaqstan Respublikasınan 446 oqıwshı qatnaspaqta. Olar arasında mektepler, akademiyalıq liceyler hám texnikumlardıń pitkeriwshi jasları bar.

Saltanatlı ashılıw máresimi eki qala arasındaǵı onlayn videokonferenciyalıq baylanıs arqalı ótkerildi. Onda universitetittiń Tashkent qalasındaǵı filialı atqarıwshı direktorı Abdulla Magrupov, Qaraqalpaqstan Respublikası Mektepke shekemgi hám mektep bilimlendiriwi ministriniń birinshi orınbasarı Aybek Dáwletbaev, instituttıń oqıw isleri boyınsha prorektorı Muxtar Ibragimov sózge shıǵıp, barlıq qatnasıwshılarǵa áwmet tiledi.

Ashılıw máresiminen soń qatnasıwshılar rus tili páninen olimpiada tapsırmaların orınlawǵa kiristi.

Atap ótiw orınlı, Gubkin pán olimpiadası 2025-jıldan berli ótkeriliwi dástúrge aylanǵan bolıp, ótken jılı oǵan 840 oqıwshı, sonnan, Qaraqalpaqstan Respublikası boyınsha 71 oqıwshı qatnasqan edi. Pán olimpiadası jeńimpazları hám sıylı orın iyeleri universitetke imtixansız mámleketlik grant tiykarında qabıl etildi.

Bıyılǵı olimpiada shártlerine bola, jeńimpazlar hám sıylı orın iyeleri universitet sertifikatları menen sıylıqlanadı jáne olarǵa imtixanlarsız oqıw imkaniyatı beriledi.

Sonday-aq, joqarı nátiyje kórsetken qatnasıwshılar toplaǵan balların kiriw imtixanları nátiyjesi sıpatında esaplatıw imkaniyatına iye boladı.

NMPI baspasóz xızmeti.