Ájiniyaz atındaǵı Nókis mámleketlik pedagogikalıq institutı ulıwma bilim beriw pánleri hám aralıqtan oqıtıw kafedrası tárepinen «Úzliksiz bilimlendiriw sistemasında aralıqtan oqıtıwdıń integraciyası» atamasındaǵı VI xalıqaralıq ilimiy-teoriyalıq konferenciya shólkemlestirildi.

Konferenciya zamanagóy bilimlendiriw sistemasına sanlı texnologiyalardı keń engiziw, aralıqtan oqıtıwdıń nátiyjeli mexanizmlerin islep shıǵıw, sonday-aq, úzliksiz bilimlendiriw procesinde innovaciyalıq qatnaslardı jetilistiriwge arnaldı.

Ilajǵa Rossiya, Qazaqstan hám basqa mámleketlerden, sonıń menen birge, respublikamızdıń abıroylı joqarı oqıw orınları, ilimiy oraylarınan professor-oqıtıwshılar, ilimpazlar hám izleniwshiler qatnastı.

Konferenciyanıń ashılıw plenar májilisinde Qazaq milliy pedagogikalıq universiteti, Qazaq milliy texnikalıq izertlew universiteti, Kaspiy texnologiyalar hám injiniring universiteti, Qazan federal universiteti, Mámleketlik social-gumanitar universiteti, sonday-aq, institut professor-oqıtıwshıları óz bayanatların jasadı.

Konferenciya dawamında aralıqtan oqıtıw platformalarınıń imkaniyatları, sanlı pedagogika tiykarları, oqıw procesine zamanagóy málimleme-kommunikaciyalıq texnologiyalardı integraciyalaw máseleleri dodalandı.

Ilaj juwmaǵında bilimlendiriwdiń sapasın arttırıw, aralıqtan oqıtıwdı ele de rawajlandırıw hám xalıqaralıq birge islesiwdi keńeytiw boyınsha áhmiyetli sheshimler islep shıǵıldı.

NMPI baspasóz xızmeti.