Ájiniyaz atındaǵı Nókis mámleketlik pedagogikalıq institutı Mektepke shekemgi hám baslawısh tálim fakulteti mektepke shekemgi tálim kafedrası tárepinen «Mektepke shekemgi tálimde innovaciyalıq izertlewler: mashqala hám sheshimler» atamasındaǵı xalıqaralıq ilimiy-ámeliy konferenciya shólkemlestirildi.

Konferenciyanı fakultet dekanı Muhabbat Allambergenova basqarıp bardı.

Ilajǵa institut professor-oqıtıwshıları, sonday-aq, Qazaqstan, Polsha mámleketlerinen ilimpazlar hám student-jaslar óz bayanatları menen qatnastı.

Konferenciya mektepke shekemgi bilimlendiriwdi rawajlandırıwdıń zamanagóy tendenciyaları, tarawda jasalma intellekt tiykarında balalarda kreativlikti rawajlandırıw, Singapur tájiriybesi tiykarında mektepke shekemgi jastaǵı balalarda túsiniklerdi qáliplestiriw, sonday-aq, balalardı kúndelikli qáwiplerden saqlaw sıyaqlı wazıypalarǵa arnaldı.

Konferenciya dawamında mektepke shekemgi bilimlendiriw shólkemlerinde sırt el tajriybesinen paydalanǵan halda «Oyınǵa baǵdarlanǵan tálim hám tárbiya» procesin alıp barıw, mektepke shekemgi jastaǵı balalarda paremikalıq janrlar arqalı ekologiyalıq mádeniyattı rawajlandırıw máseleleri dodalandı.

Sonday-aq, mektepke shekemgi tálimde innovaciyalıq izertlewlerdi jetilistiriw, júzege kelip atırǵan hár qanday mashqalalarǵa ilimiy sheshimlerdi tabıw boyınsha óz ara birge islesiwdi jetilistiriwge baǵdarlanǵan usınıslar islep shıǵıldı.

Ilaj sońında instituttıń mektepke shekemgi tálim baǵdarı 3-kurs ámeliyatshı studentleriniń paytaxtımızdaǵı 48-sanlı mektepke shekemgi bilimlendiriw shólkemi tárbiyalanıwshıları menen birgelikte shólkemlestirgen koncert baǵdarlaması konferencіya qatnasıwshıları názerine usınıldı.

NMPI baspasóz xızmeti.