Usı jıldıń 12-14-may kúnleri Ájiniyaz atındaǵı Nókis mámleketlik pedagogikalıq institutında húrmetli Prezidentimiz basshılıǵında Qaraqalpaqstan Respublikasında ámelge asırılıp atırǵan keń kólemli reformalardıń mazmunı hám áhmiyetin keń úgit-násiyatlaw, jaslar arasında doslıq hám awızbirshilik qatnasıqların bunnan bılay da bekkemlew maqsetinde Tashkent qalası, sonday-aq, wálayatlardaǵı joqarı oqıw orınlarınan kelgen 400 den aslam student-jaslar qatnasıwında «Doslıq festivalı» joqarı dárejede shólkemlestirildi.

Festival sheńberinde hár qıylı ruwxıy-aǵartıwshılıq ushırasıwlar, mádeniy ilajlar, sport jarısları, dóretiwshilik kesheleri, bayram koncerti hám ashıq sáwbetlesiwler ótkerildi. Ilajlarda elimizde jaslar ushın jaratılıp atırǵan keń imkaniyatlar, bilimlendiriw sistemasındaǵı reformalar, aymaqlardı kompleksli rawajlandırıw hám milletler aralıq tatıwlıqtı bekkemlew baǵdarında ámelge asırılıp atırǵan jumıslar haqqında tolıq maǵlıwmat berildi.

Festival dawamında túrli aymaqlardan kelgen student-jaslar óz ara pikir almasıp, oqıw procesi, institutta jaratılǵan sharayatlar, sonıń menen birge, milliy qádiriyatlar, úrp-ádetler hám mádeniy dástúrler menen jaqınnan tanısıw imkaniyatına iye boldı.

Bunday festival hám ushırasıwlar jaslardıń dúnyaǵa kózqarasın keńeytiw, olardı Watanǵa sadıqlıq, milletler aralıq doslıq hám keńpeyillik ruwxında tárbiyalawda úlken áhmiyetke iye joybar bolıp tabıladı.

«Doslıq festivalı» student-jaslarda umıtılmas tásir qaldırıp, jaslar arasında óz ara birge islesiw, doslıq hám awızbirshilik baynalısların ele de bekkemlewge xızmet etti.

NMPI baspasóz xızmeti.