Ájiniyaz atındaǵı Nókis mámleketlik pedagogikalıq institutı málimleme-resurs orayında «Kitap – mánili ómir tiykarı» atamasındaǵı VI Respublikalıq kitapqumarlar hápteligi óz juwmaǵına jetti.

Hápteliktiń juwmaqlaw ilajı sheńberinde dáslep qaraqalpaq ádebiyatınıń qos bayterekleri, Ózbekstan Qaharmanları – xalıq shayırı Ibrayım Yusupov hám xalıq jazıwshısı Tólepbergen Qayıpbergenovtıń dóretiwshiligine arnalǵan ádebiy keshe bolıp ótti.

Onda Mektepke shekemgi hám baslawısh tálim fakultetiniń tyutorı G.Artikova, oraydıń sırt el málimleme-kitapxana resursları menen islew bóliminiń baslıǵı, «Kitapxana aǵlası» kókirek belgisiniń iyesi R.Amanbaeva, instituttıń belsendi student-jasları, sonday-aq, oraydıń qánige xızmetkerleri qatnastı.

Keshe dawamında sózge shıqqanlar hám student-jaslar ádebiyatımızdıń kórnekli wákilleriniń dóretiwshiliginiń ózgeshelikleri haqqında maǵlıwmatlar berdi, shıǵarmalarınan úzindiler oqıdı.

Ilajdıń ekinshi bóliminde málimleme-resurs orayı direktorı G.Jiyemuratova sózge shıǵıp, kitapqumarlar hápteligi ilajlarına belsene qatnasqanlarǵa minnetdarshılıq bildirdi.

Háptelik sheńberinde shólkemlestirilgen túrli tańlawlar, ushırasıwlar hám keshelerge belsene qatnasqan studentlerge húrmet jarlıqları jáne sawǵalar tapsırıldı.

NMPI baspasóz xızmeti.