Ájiniyaz atındaǵı Nókis mámleketlik pedagogikalıq institutında Ózbekstan Qaharmanı, Ózbekstan hám Qaraqalpaqstan xalıq jazıwshısı Tólepbergen Qayıpbergenovtıń tuwılǵanına 97 jıl tolıwına arnalǵan «Keń dúnyaǵa qushaq ashqan jazıwshı» atamasındaǵı ádebiy keshe bolıp ótti.

Ilajǵa respublikamızǵa belgili jazıwshı hám shayırlar, ilimpazlar, institut professor-oqıtıwshıları, izleniwshiler, magistrantlar, sonday-aq, student-jaslar qatnastı.

Keshede instituttıń qaraqalpaq ádebiyatı kafedrasınıń professor-oqıtıwshıları, doktorantlar, student-jaslar Tólepbergen Qayıpbergenovtıń ómiri, dóretiwshiligi, shıǵarmalarınıń ózine tán ózgeshelikleri hám qaraqalpaq, ózbek hám dúnya xalıqları ádebiyatındaǵı ornı haqqındaǵı bayanatların oqıp berdi.

Jazıwshı shıǵarmalarınıń úyreniliwi, onıń janrlıq-tematikalıq ózgeshelikleri, dúnya xalıqları tillerine awdarılıwı sıyaqlı máseleler boyınsha pikir almasıldı.

Ádebiy keshe qaraqalpaq tili hám ádebiyatı tálim baǵdarı studentleriniń atqarıwındaǵı kórkem-ádebiy bólim, sonday-aq, professor Mariya Bekbergenovanıń «Tólepbergen Qayıpbergenovtıń dóretiwshiligi» atamasındaǵı sheberlik sabaǵı menen dawam etti.

NMPI baspasóz xızmeti.