Ájiniyaz atındaǵı Nókis mámleketlik pedagogikalıq institutında 9-may – Eslew hám qádirlew kúni múnásibeti menen ushırasıw shólkemlestirildi.

Ushırasıwǵa Qaraqalpaqstan Respublikası Joqarǵı Keńesiniń deputatı Olga Niyazova, «Milliy tiklanish» demokratiyalıq partiyası Qaraqalpaqstan Respublikası Keńesi baslıǵınıń orınbasarı Zuxra Tájixojaeva, instituttıń Nuranıylar keńesi baslıǵı Baxtıbay Atashov, Awǵanstandaǵı jawıngerlik-internacionallıq háreketler qatnasıwshısı Moyatdin Jálelov, sonday-aq, student-jaslar qatnastı.

Ilaj dawamında elimizdiń tınıshlıǵı hám xalqımızdıń abadanlıǵı jolında pidayı xızmet etken ata-babalarımız, urıs hám miynet veteranlarına húrmet kórsetiw xalqımızdıń joqarı qádiriyatlarınıń biri ekenligi atap ótildi. Sózge shıqqanlar Ekinshi jer júzilik urıs jıllarında xalqımız kórsetken mártlik, sabırlılıq haqqında sóz etip, búgingi tınısh hám paraxat turmıstıń qádirine jetiw hár bir jastıń ádiwli minneti ekenligin atap ótti.

Ushırasıw miymanlar menen ashıq sáwbet tárizinde dawam etip, olardıń turmıslıq tájiriybeleri hám másláhátleri jaslarda úlken tásir qaldırdı.

Bul ushırasıw jaslardıń júreginde watanǵa muhabbat sezimlerin bekkemlew, milliy qádiriyatlarımız hám tariyxıy ótmishke bolǵan húrmet ruwxında tárbiyalawǵa xızmet etti.

NMPI baspasóz xızmeti.