Ájiniyaz atındaǵı Nókis mámleketlik pedagogikalıq institutında Tashkent qalası hám wálayatlardaǵı joqarı oqıw orınları student-jasları qatnasıwında ótkerilip atırǵan «Doslıq festivalı» sheńberinde bir kúnlik studentler almasıwı joybarı shólkemlestirildi.

Student-jaslar arasında óz ara tájiriybe almasıw, bilimlendiriw ortalıǵı menen jaqınnan tanısıw hám doslıq qatnasıqların bekkemlew maqsetinde ótkerilgen joybarda Jizzaq mámleketlik pedagogikalıq universiteti studentleri muzıkalıq tálim baǵdarı boyınsha sabaqta qatnasıp, óz bilimlerin jetilistirdi.

Sabaq dawamında miyman jaslarǵa qaraqalpaq milliy saz ásbabı bolǵan alamoynaq duwtarı haqqında maǵlıwmatlar berildi. Sonday-aq, olar menen birgelikte qaraqalpaq hám ózbek xalıq qosıqları atqarılıp, tájiriybe almasıldı.

Ilaj sheńberinde jaslar doslıq qatnasıqların bekkemledi hám institut baǵında qosıqlar atqarıp, ayaq-oyınlarǵa tústi.

NMPI baspasóz xızmeti.