Aldın xabar bergenimizdey, Ájiniyaz atındaǵı Nókis mámleketlik pedagogikalıq institutı tárepinen usı jıldıń 3-30-may kúnleri aralıǵında Nókis rayonı «Kerder» awıl puqaralar jıyını aymaǵındaǵı «Haywanqala» tariyxıy esteliginde «Kerder-2026» III xalıqaralıq arxeologiyalıq ekspediciyası shólkemlestirilip, házirgi waqıtta qazıw hám úyreniw jumısları nátiyjeli dawam etpekte.

Xalıqaralıq arxeologiyalıq ekspediciyaǵa Rossiya Federaciyası Tatarstan Respublikası Ilimler akademiyası A.X.Xalikov atındaǵı Arxeologiya institutı, Lomonosov atındaǵı Moskva mámleketlik universiteti, Qazan federal universiteti ilimpazları, sonday-aq, instituttıń Tariyx fakulteti professor-oqıtıwshıları hám student-jasları qatnaspaqta.

Institut rektoratınıń tikkeley qollap-quwatlawı menen bıyılǵı ekspediciya joqarı shólkemleskenlik penen ótkerilmekte. Bul jerde ekspediciya qatnasıwshıları ushın barlıq qolaylıqlar jaratılǵan.

Student-jaslar arxeologiyalıq qazıw procesinde tikkeley qatnasıp, teoriyalıq bilimlerin ámeliyatta bekkemlep, zamanagóy arxeologiyalıq metodlardı ózlestirmekte. Olar taxometr, teodolit, nivelir sıyaqlı zárúr ásbaplar menen islew, qazılma orınların ólshew hám kartaǵa túsiriw, arxeologiyalıq tabılmalardı tazalaw, dizimge alıw, konservaciyalaw jáne saqlaw usılları boyınsha ámeliy kónlikpelerge iye bolmaqta.

Studentlerge qazıw jumıslarınan tısqarı sırt elli ilimpazlar hám ámeliyat basshıları tárepinen ámeliy kórgizbeli sabaqlar ótilip, onda arxeologiyalıq qazıw jumısların alıp barıw tártip-qaǵıydaları, qazıw jumısları waqtında paydalanılatuǵın ásbap-úskeneler jáne qazıw waqtında tabılǵan tabılmalar boyınsha maǵlıwmatlar berip barılmaqta.

Sonıń menen birge, studentlerdiń bos waqtın mazmunlı ótkeriw maqsetinde hár qıylı kewilashar ilajlar da shólkemlestirilmekte.

Arxeologiyalıq qazıw jumıslarınıń nátiyjeleri boyınsha qosımsha maǵlıwmatlar járiyalanadı.

NMPI baspasóz xızmeti.