Ájiniyaz atındaǵı Nókis mámleketlik pedagogikalıq institutında pitkeriw qánigelik jumısları hám magistrlik dissertaciyaların qorǵaw procesinde óz perzentleriniń tálim-tárbiyasına múnásip úles qosıp, olardıń bilimli, watan súyiwshi hám bárkamal insan bolıp kamalǵa keliwinde pidayılıq kórsetken ata-analarǵa minnetdarshılıq xatları tapsırıldı.

Ilaj dawamında institut juwapkerleri tárepinen perzentleriniń jetiskenlikleri artında ata-analardıń miyneti, itibarı hám qollap-quwatlawı áhmiyetli orın ieleytuǵını ayrıqsha atap ótildi. Jıllar dawamında perzentleriniń bilim alıwı ushın jaratılǵan sharayat, olarǵa bildirilgen isenim hám ǵamqorlıq búgingi tabıslardıń bekkem tiykarı ekeni atap ótildi.

Minnetdarshılıq xatları úlgili minez-qulqı, oqıwdaǵı belsendiligi hám erisken jetiskenlikleri menen teńleslerine órnek bolıp kiyatırǵan pitkeriwshi studentler hám magistrantlardıń ata-analarına saltanatlı túrde tapsırıldı.

Bul ata-analarǵa bildirilgen tereń minnetdarshılıq kórinisi bolıp, jas áwladtı hár tárepleme jetik insanlar etip tárbiyalaw jolındaǵı birge islesiwdi jáne de bekkemlewge xızmet etedi.

NMPI baspasóz xızmeti.