Ájiniyaz atındaǵı Nókis mámleketlik pedagogikalıq institutı hám Qazaqstan Respublikası Astana qalasındaǵı L.N.Gumilyov atındaǵı Evraziya milliy universiteti arasında jolǵa qoyılǵan qospa bilimlendiriw baǵdarlaması óziniń dáslepki nátiyjelerin bermekte.

Bul birge islesiw sheńberinde magistraturanıń ximiya hám biologiya qánigelikleri boyınsha bilim alǵan pitkeriwshilerge magistrlik diplomları saltanatlı túrde tapsırıldı. Diplomlar jas qánigelerdiń xalıqaralıq standartlar tiykarında bilim alǵanın, ilimiy potencialın jáne de arttırıw hám kásiplik jumısında jańa sheklerdi iyelewine xızmet etedi.

Diplom tapsırıw máresimi pitkeriwshiler ushın umıtılmas hám quwanıshlı máwritlerge bay boldı.

– Qospa bilimlendiriw baǵdarlaması bizge tek ǵana tereń bilim alıw emes, al qońsı mámlekettiń bilimlendiriw sisteması hám ilimiy ortalıǵın jaqınnan úyreniw imkaniyatın berdi. Búgin qolımızǵa alıp atırǵan magistrlik diplomı biziń miynetlerimizdiń joqarı tán alınıwı bolıp, keleshektegi ilimiy hám kásiplik jumısımız ushın bekkem tiykar jarattı. Bunday imkaniyattı jaratıp bergen ustazlarımız hám eki joqarı oqıw ornı basshılarına shın júrekten minnetdarshılıq bildiremen, – deydi ximiya qánigeligi pitkeriwshilerinen biri Gulzar Qaypnazarova.

Álbette, bul qospa bilimlendiriw baǵdarlaması xalıqaralıq birge islesiwdiń ámeliy nátiyjesi bolıp, jaslardıń zamanagóy bilim hám kónlikpelerdi iyelewi, ilimniń rawajlanıwına múnásip úles qosatuǵın maman qánigeler bolıp jetilisiwinde ayrıqsha áhmiyetke iye.

NMPI baspasóz xızmeti.