1991-jılı Qaraqalpaq tili hám ádebiyatı fakul’tetiniń quramında «Házirgi qaraqalpaq tili» degen atama menen «Qaraqalpaq tili» kafedrası shólkemlestirilip, onı filologiya ilimleriniń kandidatı A.Najimov 1997-jılǵa shekem basqardı.

1992-jıldıń 20-noyabrinen baslap «Fakul’tetler aralıq qaraqalpaq tili» kafedrası bólinip, oǵan filologiya ilimleriniń doktorı, professor O.D.Dospanov 1994-jılǵa shekem basshılıq etti.

Qaraqalpaq tili kafedrası dáslep «Házirgi qaraqalpaq tili», 1997-jıldan baslap «Qaraqalpaq til bilimi», 2016-jıldan baslap «Qaraqalpaq tili kafedrası» bolıp, onı filologiya ilimleriniń kandidatı, docent A.Bekbergenov (1997-1998-jıl noyabr’), prof.O.D.Dospanov (1998-2011-jıl dekabr’), docent O.Sayımbetov (2011-2014-jılları), M.Qurbanov (2014-2015-jılları), docent A.Pirniyazova (2015-2016-jılları) basshılıq qıldı. Al 2016-jıldıń dekabrinen baslap filologiya ilimleriniń doktorı Ayımbetov Maqset Qallievich basshılıq etip atır.

Házirde kafedrada 14 professor-oqıtıwshı xızmet isleydi. Olardan 1 ilim doktorı, 9 ilim kandidatı, 5 docent, 5 úlken oqıtıwshı, 4 assistent oqıtıwshı islep kelmekte. Kafedranıń ilimiy potencialı 71%dı quraydı.

Qaraqalpaq tili kafedrasında 2017-2018-oqıw jılında 25 pán oqıtıladı hám olardıń oqıw metodikalıq kompleksleri tayarlandı. Usı oqıw jılında 10200 saattı orınlaw rejelestirilgen.

Kafedrada ilimiy mektep jaratılǵan. Máselen, kafedra professorı O.Dospanovtıń ilimiy basshılıǵında 9  kandidatlıq jumıs islengen bolsa, aqırǵı 5 jıllıqta kafedrada ilimiy potencialdı kóteriw maqsetinde bir neshe kandidatlıq dissertaciyalar korǵaldı. Olardan 2008 jılı B.Qurbanbaeva «Qaraqalpaq tili qubla dialektiniń sóz jasalıw hám morfologiyası», A.Saburova «Qaraqalpaq tilinde muzıka terminleri» (ilimiy basshısı professor O.Dospanov), 2009 jılı N.Turabaeva «Qaraqalpaq tili leksikasınıń rawajlanıwında ózbek tiliniń tásiri» (ilimiy basshısı akademik H,Hamidov), 2010 jılı S.Shınnazarova «Qaraqalpaqstan Qanlıkól aymaǵındaǵı qaraqalpaqlardıń sóylew ózgeshelikleri» (ilimiy basshısı professor O.Dospanov), 2011 jılı M.Qurbanov «Qaraqalpaq tilindegi geografiyalıq terminlerdiń leksika-grammatikalıq ózgeshelikleri» (ilimiy basshısı docent O.Sayımbetov), 2012 jılı A.Pirekeeva «Kenimex qaraqalpaqları dialekti» (ilimiy basshısı professor O.Dospanov) temalarında kandidatlıq dissertaciyaların tabıslı qorǵadı.

Búgingi kúnde kafedrada 2 ta doktorant, 1 ta erkin izleniwshi  doktorlik dissertaciyaları boyınsha jumıs alıp barmaqta. R.Opaeva f.i.d, prof M.Qudaybergenov basshılıǵında, M.Qayıpnazarova f.i.d, prof Yu.Ibragimov basshılıǵında ilimiy jumıs alıp barmaqta.

Kelesi waqıtta Kafedra doktorantlarınan R.Opaeva, M.Qayıpnazarova, G. Mambetovalardıń 2018-jılı doktorlıq dissertaciyaların qorǵawı kútilmekte.