Búgin, 14-avgust kúni Ájiniyaz atındaǵı Nókis mámleketlik pedagogikalıq institutında 2021-2022-oqıw jılı ushın magistratura qánigeliklerine hújjet tapsırǵan abiturientlerge qánigelik pánlerden imtixanlar baslandı.

Institutta ulıwma 22 magistratura qánigeligine mámleketlik buyırtpası parametrlerine muwapıq jámi 110 orın, sonnan mámleketlik grant tiykarında 55 hám tólemli kontrakt tiykarında 55 orın ajıratılǵan.

Imtixanlar sanitariyalıq-epidemiologiyalıq qaǵıydalarǵa ámel etken halda ótkerilip, usı jıldıń 17-avgust kúnine shekem tastıyıqlanǵan keste boyınsha kúnine 2 smenada – birinshi smena 09:00 – 11:30 aralıǵında, ekinshi smena 15:00 – 17:30 aralıǵında instituttıń bas imaratında (Túrkiy tiller fakulteti) dawam etedi.

– Instituttıń qaraqalpaq tili hám ádebiyatı bakalavr tálim baǵdarın tabıslı pitkerip, Moynaq rayonındaǵı 9-sanlı ulıwma bilim beriw mektebinde muǵallim bolıp islep atırman, – deydi Azamat Nuratdinov. – Ana tilimizdiń rawajlanıw tendenciyaların ilimiy tiykarda úyreniw, bul baǵdarda ilimiy-izertlew jumısların alıp barıw maqsetinde magistratura qánigeligine hújjet tapsırdım.

Magistratura qánigeliklerine ótkerilip atırǵan imtixanlardıń ádil hám ashıq-aydın ótiwin támiyinlew maqsetinde qálewshiler ushın imtixan barısın onlayn tárizde baqlap barıw imkaniyatı jaratılǵan.

Maǵlıwmat ornında atap ótiw kerek, qánigelik pánlerden ótkerilip atırǵan imtixanlardıń nátiyjeleri instituttıń rásmiy veb-saytı hám onıń sociallıq tarmaqlardaǵı rásmiy kanallarında járiyalanadı.

Islam Matekov,
NMPI baspasóz xatkeri.
Avtordıń túsirgen fotoları.