Usı jıldıń 17-20-sentyabr kúnleri Nókis qalasında bolıp ótetuǵın II Xalıqaralıq baqsıshılıq kórkem óneri festivalı sheńberinde baqsı, aqın hám jıraw atqarıwshıları arasında respublikalıq tańlaw bolıp ótti.

Nókis qalasındaǵı Qaraqalpaq mámleketlik jas tamashagóyler teatrında bolıp ótken tańlawǵa Ózbekstan kóleminde 80 nen aslam Ózbekstan hám Qaraqalpaqstan xalıq baqsıları, «Nihol» mámleketlik sıylıǵınıń laureatları hám talantlı jas baqsı jırawlar qatnastı.

Respublikalıq tańlawǵa Ájiniyaz atındaǵı Nókis mámleketlik pedagogikalıq institutı pedagogika fakulteti muzıkalıq tálim baǵdarınıń studentlerinen «Nihol» mámleketlik sıylıǵınıń laureatı Ádilbek Baxtıbaev jırawshılıq, al S.Qalmurzaeva, D.Genjebaeva hám M.Palvashevalar baqsıshılıq boyınsha qatnasıp, óz qábiletlerin kórsetti.

Quwanıshlısı, jırawshılıq baǵdarı boyınsha Ádilbek Baxtıbaev respublikalıq tańlawda sıylı 2-orındı iyeledi.

Sonı da ayrıqsha atap ótiw orınlı, 17-20-sentyabr kúnleri Nókis qalasında bolıp ótetuǵın II Xalıqaralıq baqsıshılıq kórkem óneri festivalınıń ashılıw hám jabılıw bayram saltanatlarında NMPI magistrantı, «Nihol» mámleketlik sıylıǵı hám kóplegen respublikalıq, xalıqaralıq tańlawlardıń laureatı Muhammed Tórebekov hám NMPI studenti, Zulfiya atındaǵı mámleketlik sıylıqtıń hám kóplegen respublikalıq, xalıqaralıq tańlawlardıń laureatı Dinara Nuratdinovalar qatnasıwı jobalastırılǵan.

NMPI baspasóz xızmeti.