Ájiniyaz atındaǵı Nókis mámleketlik pedagogikalıq institutında házirgi waqıttaǵı ekologiyalıq mashqalalardı fizikalıq kózqarastan sheshiw, ilimiy baǵdarda birge islesiwdi shólkemlestiriw, ilimiy hám bilimlendiriw mákemeleri arasındaǵı baylanıstı jedellestiriw jáne jańa baylanıslardı payda etiw, sonday-aq, ilimiy-izertlew jumıslarına jaslardı keń túrde tartıw maqsetinde «Fizika hám ekologiya» atamasındaǵı respublikalıq ilimiy-teoriyalıq hám ámeliy konferenciya bolıp ótti.

Konferenciya «Ekologiyanıń ilimiy tiykarları hám qayta tiklenetuǵın energiya», «Fizika, astronomiya hám ekologiyanı oqıtıwda innovaciyalıq qatnas», «Yarım ótkizgishler hám kondensirlengen ortalıq fizikası mashqalaları» sıyaqlı baǵdarlar boyınsha jumıs alıp bardı.

Konferenciyanıń ashılıw plenarlıq májilisinde kóterilip atırǵan máselelerdiń áhmiyetli hám aktuallıǵı, konferenciyanıń maqseti jáne wazıypalarınan kelip shıǵatuǵın ilimiy bayanatlar jasaldı.

Atap aytqanda, NMPI fizikanı oqıtıw metodikası kafedrasınıń professorı, awıl xojalıǵı ilimleriniń doktorı A.Jumamuratov «Fizika menen ekologiyanıń nızamlı baylanısları», Norvegiyanıń Energiya hám texnologiya institutınan fizika-matematika ilimleriniń doktorı S.J.Karajanov «Солнечные модули: применения и проблемы», Sankt-Peterburg mámleketlik universiteti klimatologiya hám qorshaǵan ortalıq monitoringi kafedrası docenti N.A.Lemeshko «Влияние глобальных и региональных изменений климата на почвы Ярославского Поволжья», NMPI fizikanı oqıtıw metodikası kafedrasınıń docenti, texnika ilimleriniń kandidatı S.Ashirbekova «Применение SMART технологии в процессе обучения», NMPI fizikanı oqıtıw metodikası kafedrasınıń docenti, PhD N.Matjanov «Fizika oʻqitish jarayonida barqaror rivojlanish uchun ekologik ta’lim» atamasındaǵı bayanatları menen qatnastı.

Konferenciya óz jumısın sekciyalarda dawam ettirdi.

Konferenciyanıń ekinshi kúni ilaj qatnasıwshılarınıń Moynaqqa saparı hám jabılıw májilisi ótkeriliwi belgilengen.