ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

NMPIde Husayn Jovid atındaǵı Ázerbayjan mádeniyatı hám ádebiyatı orayı ashıldı

Usı jıldıń 20-21-oktyabr kúnleri Ázerbayjan Respublikasınıń Ózbekstandaǵı elshixanası janındaǵı Haydar Aliev atındaǵı Ázerbayjan mádeniyatı orayınıń baslaması menen Nókis qalasında Ázerbayjan mádeniyatı hám ádebiyatı kúnleri ótkerildi.

Búgin, 21-oktyabr kúni Ájiniyaz atındaǵı Nókis mámleketlik pedagogikalıq institutında Ázerbayjan Respublikası Milliy Majlisi janındaǵı mádeniyat komitetiniń baslıǵı, deputat Ganira Pashaeva, Ázerbayjan Respublikasınıń Ózbekstandaǵı elshixanası janındaǵı Haydar Aliev atındaǵı Ázerbayjan mádeniyatı orayınıń direktorı Samir Abbasov basshılıǵındaǵı delegaciya wákilleri, sonday-aq, Qaraqalpaqstan Respublikası Ministrler Keńesi Baslıǵınıń orınbasarı R.Zarekeev, institut rektorı B.Otemuratov qatnasıwında institutta Husayn Jovid atındaǵı Ázerbayjan mádeniyatı hám ádebiyatı orayınıń saltanatlı ashılıw máresimi bolıp ótti.

Orayda Ózbekstan hám Ázerbayjan mámleketleri arasındaǵı doslıq baylanısları, ádebiyat, mádeniyat, kórkem óner, tariyx baǵdarlarında eki mámlekettiń qarım-qatnasıqları, sonıń menen birge, tuwısqan ázerbayjan xalqınıń milliy kiyim-kenshekleri, kórkem óner úlgileri, ádebiy kitaplarınan ibarat kórgizbeler, paydalı dárekler orın alǵan.

Ilaj sheńberinde delegaciya aǵzaları institut rektorı B.Otemuratovtıń qabıllawında bolıp, Ázerbayjan Respublikasındaǵı joqarı oqıw orınları hám ilimiy-izertlew orayları menen birge islesiw, ásirese, akademiyalıq mobillik, ilimiy-pedagogikalıq baǵdarlarda nátiyjeli birge islesiwdi jolǵa qoyıw sıyaqlı máseleler dodalandı.

Ázerbayjan delegaciyası qaraqalpaq ádebiyatı, kórkem óneri, mádeniyatı hám tariyxına baylanıslı kóplegen shıǵarmalar, ásirese, Ájiniyaz, Berdaq, Ibrayım Yusupov, Tólepbergen Qayıpbergenovlardıń shıǵarmaları, qaraqalpaq xalıq dástanların, folklorlıq dóretpelerin jaqsı biletuǵınlıǵın, usı baǵdar boyınsha eki tárepleme ilimiy jumıslardı alıp barıw ushın óz usınısların bildirdi.

Ilaj sońında instituttıń qábiletli student jasları hám Ázerbayjan Respublikasınan kelgen kórkem óner sheberleri atqarıwındaǵı koncert baǵdarlaması shólkemlestirilip, onda qaraqalpaq, ózbek hám ázerbayjan xalıqlarınıń doslıǵı jırlanǵan milliy qosıqlar, ayaq-oyınları atqarıldı.

Islam Matekov,
NMPI baspasóz xatkeri.
Avtordıń túsirgen fotoları.