ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

AQShtıń Ózbekstandaǵı elshisi Nókis mámleketlik pedagogikalıq institutında

Búgin, 29-oktyabr kúni Amerika Qurama Shtatlarınıń Ózbekstandaǵı ayrıqsha hám tolıq huqıqlı elshisi Deniel Rozenblyum Ájiniyaz atındaǵı Nókis mámleketlik pedagogikalıq institutına keldi.

Elshi Deniel Rozenblyum institutta AQSh elshixanası menen birgelikte 2016-jıldan berli jumıs islep kiyatırǵan «ACCESS» baǵdarlaması sheńberinde ámelge asırılıp atırǵan jumıslar, jaratılǵan sharayatlar menen tanıstı.

Institut bazasında jumıs alıp barıp atırǵan «ACCESS» baǵdarlaması 2016-2018-jıllarda mektep oqıwshıları ushın, 2018-2020-jıllarda instituttıń filologiya tálim baǵdarlarına qánigelespegen bakalavriat tálim baǵdarlarında oqıp atırǵan studentler ushın «STEM» baǵdarlaması, al 2020-jıldan 2022-jılǵa shekem ulıwma bilim beriw mektepleriniń 8-9-klass oqıwshılarına sabaqlar shólkemlestiriw arqalı ámelge asırılıp kelinbekte.

AQSh elshisi institutta «ACCESS» baǵdarlaması sheńberinde oqıtılıp atırǵan oqıwshılar menen ushırasıp, olar menen sáwbetlesti. Baǵdarlama boyınsha ámelge asırılıp atırǵan jumıslarǵa joqarı baha berdi hám jıl juwmaǵı boyınsha eń jaqsı kórsetkishlerge erisken eki oqıwshını Amerika Qurama Shtatlarına bir aylıq jazǵı lagerge jiberiw boyınsha usınısın bildirdi.

Ushırasıwda institut rektorı B.Otemuratov studentler hám barlıq qálewshiler ushın shet tillerin úyreniw baǵdarında jaratılǵan sharayatlar, ámelge asırılıp atırǵan jumıslar, sonday-aq, xalıqaralıq birge islesiwlerdiń nátiyjeleri haqqında maǵlıwmatlar berdi.

Elshi Deniel Rozenblyum Qaraqalpaqstanda birinshi márte bolıp turǵanı, bul jerde jámiyetlik-siyasiy, sociallıq-ekonomikalıq, mádeniy-gumanitar tarawlarda ámelge asılırıp atırǵan reformalardıń nátiyjeleri joqarı dárejede ekenliginiń gúwası bolıp atırǵanın atap ótti.

AQSh elshisiniń elimizge saparı dawam etpekte.

Islam Matekov,
NMPI baspasóz xatkeri.
Avtordıń túsirgen fotoları.