ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

NMPI jámááti hám studentleri «Jasıl mákan» akciyasına belsene qatnastı

Ózbekstan Respublikası Prezidenti Shavkat Mirziyoev basshılıǵında ótkerilgen májiliste mámleketimiz boylap «Jasıl mákan» ulıwma milliy joybarın ámelge asırıw ilajları kórip shıǵılıp, usı jıldıń 10-dekabr kúnine shekem terek egiw boyınsha «áhmiyetli 40 kúnlik» járiyalanǵan edi.

Qalamızdıń ekologiyalıq jaǵdayın jaqsılaw, hawanıń tazalıǵın saqlaw hám jaslar arasında ekologiyalıq mádeniyattı qáliplestiriw menen birge olardıń qorshaǵan ortalıqqa bolǵan súyispenshiligin arttırıw maqsetinde búgin, 13-noyabr kúni Qaraqalpaqstan Respublikası Ministrler Keńesi tárepinen Nókis qalasında «Jasıl mákan» akciyası ótkerildi.

Paytaxtımızdaǵı «Jiydeli Baysın» mákan puqaralar jıyını aymaǵındaǵı 6 gektarlıq maydanǵa hár qıylı dekorativ, miywe hám sayalı terek nállerin otırǵızıw jumıslarına erte azannan baslap Ájiniyaz atındaǵı Nókis mámleketlik pedagogikalıq institutı jámááti hám student jasları belsene qatnastı.

Institut studentleri qánigelerdiń kórsetpeleri tiykarında ekologiya komiteti tárepinen usınıs etilgen katalpa, pavlovniya, yapon saforası, qaraǵash, tut hám akaciya sıyaqlı terek nállerin otırǵızdı.

Akciya qatnasıwshılarına atız basında túslik awqat tayarlanıp, kórkem óner sheberleriniń atqarıwındaǵı koncert baǵdarlaması shólkemlestirildi.

Akciya juwmaǵında terek nállerin otırǵızıw jumıslarında belsendilik kórsetken institut jámáátine Qaraqalpaqstan Respublikası Ministrler Keńesiniń minnetdarshılıq xatı tapsırıldı.

«Jasıl mákan» akciyası elimiz boylap dawam etpekte.

Islam Matekov,
NMPI baspasóz xatkeri.
Avtordıń túsirgen fotoları.