2022-jıl 19-yanvarda Ózbekstan Respublikası Ministrler Kabinetiniń «Shet tillerin úyreniwdi jetilistiriw boyınsha qosımsha ilajlar haqqında»ǵı 34-sanlı qararı qabıl etildi.

Qararǵa muwapıq, Shet tillerin úyreniwdi ǵalabalastırıw agentliginiń byudjetten tıs qorına bir mártelik 15 milliard sum muǵdarında qarjı ajıratıladı.

2022-jıl 1-marttan shet tili páni muǵallimleriniń tıńlap túsiniw, oqıw, jazıw hám sóylew kompetenciyaların rawajlandırıwǵa jáne sertifikatqa iye bolıwına baǵdarlanǵan oqıw kursları shólkemlestiriledi.

2022-2023-oqıw jılınan mektepler ushın zamanagóy til úyretiw metodikaları tiykarında islep shıǵılǵan shet tili sabaqlıqları basıp shıǵarıladı.

Sonday-aq, 2022-2023-oqıw jılı qabıllawınan shet tilleri boyınsha kadrlar tayarlawǵa qánigelestirilgen bir qatar joqarı oqıw orınlarına kiriw imtixanlarında shet tili páninen tıńlap túsiniw, oqıw, jazıw hám sóylew kompetenciyaların anıqlaw jáne bahalawǵa baǵdarlanǵan kásiplik (dóretiwshilik) imtixan ótkeriw jolǵa qoyıladı. Atap aytqanda:

Pánler kompleksine shet tili birinshi pán sıpatında kirgizilgen tómendegi joqarı oqıw orınlarınıń bakalavriat tálim baǵdarlarına:

– Ózbekstan mámleketlik jáhán tilleri universiteti;

– Samarqand mámleketlik shet tilleri institutı;

– Tashkent mámleketlik shıǵıstanıw universiteti.

Tómendegi joqarı oqıw orınlarınıń shet tilleri boyınsha pedagoglardı tayarlaytuǵın bakalavriat tálim baǵdarlarına:

– Tashkent mámleketlik pedagogikalıq universiteti;

– Qoqand mámleketlik pedagogikalıq institutı;

– Nókis mámleketlik pedagogikalıq institutı.

Shet tili páninen kásiplik (dóretiwshilik) imtixan Mámleketlik test orayı tárepinen ámelge asırıladı.

2024-2025-oqıw jılınan joqarı oqıw orınlarına kiriw imtixanları ushın belgilengen májbúriy pánler kompleksine shet tili páni basqıshpa-basqısh kirgiziledi.

2022-jıl 1-sentyabrden mektepke shekemgi, ulıwma orta, orta arnawlı hám professional, sonday-aq, mektepten tıs bilimlendiriw shólkemleri shet tili páni muǵallimleriniń attestaciyası procesi oqıw páni boyınsha qánigelik sınaqları Bilimlendiriw sapasın qadaǵalaw boyınsha mámleketlik inspekciyası tárepinen ámelge asırıladı.

2022-jıl 1-fevraldan 2024-jıl 1-yanvarǵa shekem Tashkent hám Samarqand qalalarında jumıs alıp barıp atırǵan mámleketlik emes bilimlendiriw shólkemleri:

– imarat hám obektler ijara tólemi qárejetleriniń 50 procentine shekemgi bólegin tólep beriw tártibi engiziledi;

– ministrlik hám mákemeler sistemasındaǵı kolledj jáne texnikumlarda jumısların alıp barǵanda ijara tóleminen azat etiledi (saqlaw hám kommunallıq tólemler boyınsha qárejetler buǵan kirmeydi).

2022-jıl 1-fevraldan C1 dárejesindegi milliy yamasa oǵan teńlestirilgen sáykes dárejedegi xalıqaralıq tán alınǵan sertifikatqa iye rus tili páni muǵallimlerine sertifikat alınǵan kúnnen baslap 2 jıl dawamında ústeme tólenedi.

Islam Matekov,

NMPI baspasóz xatkeri.