Ájiniyaz atındaǵı Nókis mámleketlik pedagogikalıq institutı Ózbek tili kafedrası docenti, filologiya ilimleriniń kandidatı, Ózbekstan hám Qaraqalpaqstan Respublikaları Xalıq bilimlendiriw aǵlası Eshbay aǵa Xojaniyazov 2022-jıl 25-mart kúni dúnyadan ótti.

E.Xojaniyazov 1943-jıl 16-yanvarda Qaraqalpaqstan Respublikası Ámiwdárya rayonında tuwılǵan. 1965-jılı Samarqand mámleketlik universitetin pitkerip kelgen soń, 9 jıl dawamında Qaraqalpaqstan Respublikası Ámiwdárya rayonındaǵı 36-sanlı mektepte balalarǵa ana tili hám ádebiyatı páninen sabaq berdi.

Ol 1974-jıldan baslap 1990-jılǵa shekem Qaraqalpaq mámleketlik universitetinde, 1990-jıldan ómiriniń aqırına shekem Nókis mámleketlik pedagogikalıq institutı Ózbek tili kafedrasında studentlerge ilim sırların úyretip keldi. Dáslep usı kafedrada oqıtıwshı, úlken oqıtıwshı, docent lawazımlarında hár tárepleme jemisli miynet etti.

Ol ózbek tili hám ádebiyatı bakalavriat tálim baǵdarı hám magistratura qánigelikleri studentlerine ózbek til iliminiń teoriyalıq hám mashqalalı  máselelerinen sabaq berdi. Sabaqlardı ilimiy, aldınǵı pedagogikalıq texnologiyalar tiykarında, studentlerdiń baslaması hám qızıǵıwshılıǵın itibarǵa alǵan halda alıp barıwǵa eristi. Sol sebepli de ol kásilpesleri hám studentler arasında úlken abıroy hám húrmetke iye bolıp, olardıń itibarına miyasar boldı.

E.Xojaniyazov tálim-tárbiya jumısların ilimiy isler menen birge alıp barıwǵa háreket etti hám ózbek til iliminiń eń kem úyrenilgen tarawı – ózbek tili stilistikası menen qızıǵıp, 1984-jılı “Ózbek ádebiy tili ilimiy hám kórkem stillerinde  atributiv birikpelerdiń semantikalıq-stilistikalıq qásiyetleri” atamasında kandidatlıq  dissertaciyasın tabıslı jaqlap shıqtı. Keyin ala ilimpazdıń “Oʻzbek adabiy tili ilmiy va badiiy uslublarining uslubiy belgilari” (1989), “Вопросы словосочетания в тюркских языках” (jámáátlik avtorlar menen birgelikte, 1993), “Hozirgi oʻzbek adabiy tili” (2003, 2011. jámáátlik avtorlar menen birgelikte) qusaǵan kitapları hám til iliminiń mashqalalı máselerine arnalǵan 100 den artıq ilimiy hám ilimiy-stilistikalıq maqalaları baspadan shıqtı.

Ájiniyaz atınlaǵı Nókis mámleketlik pedagogikalıq institutı jámááti marhumnıń shańaraq aǵzalarına, aǵayin-tuwısqanlarına tereń qayǵırıw menen kewil bildirip, Allahtan sabır tileydi.

Ashıq kewil hám mehriban ustaz, ilim-pán pidayısı Eshbay Xojaniyazov kásiplesleri, shákirtleriniń yadında máńgi saqlanadı.

Ájiniyaz atındaǵı Nókis mámleketlik pedagogikalıq institutı jámááti.