Búgin, 1-may kúni Ájiniyaz atındaǵı Nókis mámleketlik pedagogikalıq institutında ulıwma bilim beriw mektepleriniń pitkeriwshi klass oqıwshıları arasında ximiya hám biologiya pán olimpiadasınıń institut basqıshı bolıp ótti.

Pán olimpiadasınıń bul basqıshına Qaraqalpaqstan Respublikalıq basqıshta jeńimpaz dep tabılǵan ulıwma bilim beriw mektepleriniń pitkeriwshi klass oqıwshıları qatnastı.

Kúnniń dáslepki yarımında qatnasıwshılar jazba jumısı arqalı óz bilimlerin sınaqtan ótkergen bolsa, ekinshi yarımında laboratoriyalıq jumıslardı ámelge asırdı.

Pán olimpiadası Ózbekstan Respublikası Prezidentiniń «Ximiya hám biologiya baǵdarlarında úzliksiz bilimlendiriwdiń sapasın hám ilimniń nátiyjeliligin arttırıw ilajları haqqında»ǵı qararı, Joqarı hám orta arnawlı bilimlendiriw ministrliginiń tiyisli buyrıǵı, sonday-aq, Ájiniyaz atındaǵı Nókis mámleketlik pedagogikalıq institutı hám Qaraqalpaqstan Respublikası Xalıq bilimlendiriw ministrligi arasındaǵı qospa qararǵa muwapıq ótkerildi.

Oqıwshılardıń jazba hám laboratoriyalıq jumısları tóreshiler quramı aǵzaları tárepinen ádil túrde bahalandı.

Solay etip, pán olimpiadasınıń institut basqıshında 1-orındı Tórtkúl rayonındaǵı 29-sanlı ulıwma bilim beriw mektebiniń oqıwshısı M.Samandarova, 2-orındı Qońırat rayonındaǵı 35-sanlı ulıwma bilim beriw mektebiniń oqıwshısı A.Qoshniyazova hám 3-orındı Kegeyli rayonındaǵı 19-sanlı ulıwma bilim beriw mektebiniń oqıwshısı N.Xojabaevalar iyeledi hám dárejeli diplomlar menen sıylıqlandı. Sonday-aq, pán olimpiadasınıń institut basqıshına qatnasqan barlıq oqıwshılarǵa sertifikatlar tapsırıldı.

— Pán olimpiadası ádil ótti. Men óz bilim hám kónlikpelerimnen kelip shıǵıp, tapsırmalardı hám laboratoriyalıq jumıslardı orınlawǵa háreket ettim. Mektebimiz Tórtkúl rayonı «Ullıbaǵ» awıl puqaralar jıyını aymaǵında jaylasqan. Barlıq zamanagóy sharayatlar, laboratoriya bólmeleri menen támiyinlengen. Usınday nátiyjege erisiwimde ustazlarım – biologiya páni oqıtıwshısı Sh.Davletova hám ximiya páni oqıtıwshısı N.Nurmaxanovalarǵa sheksiz minnetdarshılıq bildiremen,-deydi pán olimpiadasınıń institut basqıshında 1-orındı iyelegen M.Samandarova.

Maǵlıwmat ornında atap átiw kerek, pán olimpiadası juwmaqları boyınsha tiyisli balldı toplap, jeńimpaz bolǵan M.Samandarovanı institutqa oqıwǵa qabıllaw boyınsha Mámleketlik komissiyasına usınıs beriledi.

NMPI baspasóz xızmeti.