ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

NMPIde kúnniń áhmiyetli máselelerine baǵıshlanǵan ushırasıw bolıp ótti

Búgin, 9-iyun kúni Ájiniyaz atındaǵı Nókis mámleketlik pedagogikalıq institutında xalıqtı azıq-awqat ónimleri menen úzliksiz támiyinlew, sonday-aq, institutta korrupciyalıq jaǵdaylardıń aldın alıw máselelerine baǵıshlanǵan ushırasıw bolıp ótti.

Ushırasıwǵa Berdaq atındaǵı Qaraqalpaq mámleketlik universiteti docenti, ekonomika ilimleriniń doktorı N.Tilewov, Nókis qalası prokuraturası aǵa tergewshisi A.Qurbanov, fakultet dekanlarınıń orınbasarları, professor-oqıtıwshılar, tyutorlar hám belsendi student-jaslar qatnastı.

Ilajdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov basqarıp bardı.

Ushırasıwda atap ótilgenindey, Ózbekstan Respublikası Prezidenti Shavkat Mirziyoyev basshılıǵında bolıp ótken videoselektor jıynalısında xalıqtı azıq-awqat ónimleri menen úzliksiz támiyinlew ilajları dodalanıp, ámelge asırılıwı zárúr bolǵan tiykarǵı wazıypalar belgilendi.

Dúnyada kún sayın azıq-awqat penen baylanıslı sheklewler hám bahalardıń ósiwi baqlanbaqta. Álbette, bul globallasqan dúnyanıń ajıralmas bólegi bolǵan biziń mámleketimizge de óz tásirin kórsetpekte.

Bahalardıń kóteriliwine dúnya bazarlarında biyday bahasınıń 50 procentke, ósimlik mayınıń 33 procentke, qumsheker 14 procentke, nefttiń 47 procentke qımbatlaǵanı tikkeley tásir etpekte.

Mámleketimiz basshısı bul baǵdarda ámelge asırılıwı zárúr bolǵan wazıypalardı belgilep bere otırıp: «Tiykarǵı maqsetimiz – xalıqtı razı etiw ekenligin hesh qashan umıtpawımız kerek»,-degen edi.

Ushırasıwda Ózbekstanda xalıqtı azıq-awqat ónimleri menen támiyinlew boyınsha ámelge asırılıp atırǵan jumıslar haqqında jıynalǵanlarǵa tolıq maǵlıwmatlar berildi.

Atap aytqanda, respublikamızda 2023-jıl 1-yanvarǵa shekem 22 túrdegi tutınıw hám azıq-awqat ónimleri (gósh, balıq, sút ónimleri, miywe, ósimlik mayı) bajıxana tólemlerinen azat etildi.

Bıyılǵı jılǵı ǵálle orım-jıyımlarında 7 million tonna biyday ónimin jetistiriw jobalastırılıp atırǵanı, bul xalıqtıń tiykarǵı talapların qanaatlandırıwǵa jeterli muǵdar ekenligi, sonday-aq, mámlekettiń azıq-awqat ónimleri qorı haqqında qatnasıwshılar keń túsinikke iye boldı.

Sonıń menen birge, házirgi waqıtta mámleketimizde rawajlanıwdıń tamırına balta urıp atırǵan tiykarǵı mashqalalardıń biri – korrupciya ekenligi atap ótilip, oǵan qarsı gúresiw baǵdarında islenip atırǵan jumıslar hám olardıń nátiyjeliligi boyınsha pikir almasıwlar bolıp ótti.

Ushırasıw dawamında qatnasıwshılar tárepinen joqarıda atap ótilgen máseleler boyınsha sorawlar berilip, qánigelerden tolıq juwaplar alındı hám aldaǵı wazıypalar boyınsha pikir-usınıslar bildirildi.

NMPI baspasóz xızmeti.