Búgin, 29-avgust kúni Ájiniyaz atındaǵı Nókis mámleketlik pedagogikalıq institutında jaslar arasında jınayatshılıq hám huqıqbuzarlıqlardıń aldın alıw boyınsha jańasha mexanizmlerden paydalanıw máselelerine baǵıshlanǵan ushırasıw bolıp ótti.

Ilajǵa Ózbekstan Respublikası Ishki isler ministrligi Huqıqbuzarlıqlar profilaktikası bas basqarmasınıń bólim baslıǵı, podpolkovnik Bahriddin Sultanov, Qaraqalpaqstan Respublikası Ishki isler ministrligi Huqıqbuzarlıqlar profilaktikası basqarmasınıń baslıǵı Rustam Eshimbetov, joqarı oqıw orınlarınıń profilaktikalıq inspektorları, fakultet dekanalarınıń jaslar menen islesiw boyınsha orınbasarları, tyutorlar qatnastı.

Ushırasıwdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Quvondiq Qodirov alıp bardı.

Ilajda sońǵı jıllarda mámleketimizde joqarı bilimlendiriw sistemasın rawajlandırıw, bilim beriwdi sapalıq jaqtan jańa basqıshqa kóteriw, jaslardı joqarı bilimlendiriwge qamtıp alıw dárejesin arttırıw, olardıń bilim alıp, kásip-óner iyelewi ushın jaratılıp atırǵan sharayatlar, elimizde jaslar siyasatınıń húkimetlik dárejege kóterilgenligi, sonday-aq, tarawdaǵı sońǵı reformalardıń nátiyjeleri haqqında sóz boldı.

Usınday imkaniyatlar hám sharayatlarǵa qaramastan búgingi kúnde jaslar arasında jınayatshılıq hám huqıqbuzarlıqlardıń ushırasıp turǵanlıǵı, bunda ásirese, joqarı oqıw orınlarında olar menen bunnan bılay da tıǵız birge islesiw zárúr ekenligin kórsetpekte.

Atap ótilgenindey, búgingi kúnde student-jaslar qatnasıwındaǵı jınayatlardıń tilekke qarsı 115 esege artıwı bul baǵdarda jańasha mexanizmlerdi qollanıwdı talap etpekte.

Bul processte joqarı bilimlendiriw sistemasında jolǵa qoyılǵan tyutorlar hám profilaktikalıq inspektorlar lawazımlarınıń engizilgenligi óziniń ámeliy nátiyjesin kórsetip atırǵan bolıwına qaramastan, olardıń jumısların ele de jetilistiriw zárúrligi kózge taslanbaqta.

Ushırasıwda jaslar tárbiyası máselesinde joqarı oqıw orınlarınınıń profilaktikalıq inspektorları hám tyutorlardıń máhállelerdegi profilaktikalıq inspektorlar jáne jaslar jetekshileri menen tıǵız birge islesiwin támiyinlew, tyutorlar tárepinen jaslardıń qızıǵıwshılıǵı, mashqalaları tiykarında huqıqıy úgit-násiyat jumıslarınıń alıp barılıwı boyınsha usınıslar bildirildi.

Sonıń menen birge, usı jıldıń 15-sentyabr hám 15-oktyabr kúnleri aralıǵında ótkeriletuǵın studentler qáwipsizligi aylıǵı ilajlarına belsene qatnasıw, bunı shólkemleskenlik penen ótkeriw ushın ámeliy usınıslar bildiriw máseleleri atap ótildi.

Ilajda kóterilgen máseleler boyınsha aldaǵı waqıtlarda birgelikte ámelge asırılatuǵın jumıslar belgilep alındı.

NMPI baspasóz xızmeti.