Ájiniyaz atındaǵı Nókis mámleketlik pedagogikalıq institutında Qaraqalpaqstan xalıq jazıwshısı, belgili kinoscenarist, dramaturg, Berdaq atındaǵı mámleketlik sıylıqtıń laureatı Muratbay Nızanov penen ushırasıw bolıp ótti.

Ushırasıwǵa institut professor-oqıtıwshıları, tyutorlar hám student-jaslar qatnastı.

Ilajdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov basqarıp bardı.

Ushırasıwda Qaraqalpaqstan xalıq muǵallimi, pedagogika ilimleriniń kandidatı, docent A.Pazılov jazıwshınıń ómiri hám dóretiwshiligi haqqında jıynalǵanlarǵa maǵlıwmatlar berip ótti.

Dóretiwshilik jumısları dawamında Muratbay Nızanov búgingi kúnge shekem eliwden aslam kitaplar, tańlamalı shıǵarmalarınıń on tomlıǵı, «Qaraqalpaqlar» kitabınıń eki tomlıǵı hám basqa da dóretpeleri menen xalqımızdıń súyikli jazıwshısına aylanǵan.

Xalqımız Muratbay Nızanov degendi esitken waqıtta qaraqalpaq xalkınıń milliy ózine tánligin, xarakterin kórsetip beretuǵın kórkem hám hújjetli filmlerdi de kóz aldına keltiredi. Toǵız kórkem film, qırqtan aslam hújjetli film, tórt multfilmniń scenariy avtorı, «Túlkishek» balalar jurnalınıń shólkemlestiriwshisi bolǵan jazıwshı qaraqalpaq kino ónerinde de óziniń belgili ornına iye.

Studentler menen soraw-juwap formatında ótkerilgen ushırasıwda Muratbay Nızanov házirgi waqıttaǵı óziniń dóretiwshilik jumısları haqqında maǵlıwmatlar berdi.

– Aldın kinorejissyor Qudrat Atajanov penen birgelikte Ájiniyaz shayır ómirinen sóz etetuǵın «Ziywar» kórkem filmin súwretke alǵan edik. Biraq, ele bul film úlken ekranlarǵa shıǵarılmadı. Bıyıl sol film Kinematografiya agentligi basshılarında úlken qızıǵıwshılıq oyatıp, ele de keń masshtabda súwretke alıw boyınsha kelisip aldıq. Keyin usı film scenariysin keńeytip, ózgerisler kirgizip, kinorejissyorǵa tapsırdım. Sonday-aq, xalıqlar doslıǵı temasına arnalǵan «Kópir» kórkem filmi ushın scenariy jazıp, onı da tapsırdım. Nesip etse aldımızdaǵı jılı usı filmlerdiń súwretke alıw processleri bolıp ótedi, – deydi Muratbay Nızanov. – Sonday-aq, kóplegen avtorlar jámááti menen birgelikte qaraqalpaq xalqınıń tariyxında ótken belgili mámleketlik hám jámiyetlik ǵayratkerler, ullı tulǵalar ómirinen sóz etetuǵın «Úlkemizdiń ájayıp adamları» atamasındaǵı eki tomlıq kitaptı baspadan shıǵardıq. Bul kitaplar xalqımız arasında úlken qızıǵıwshılıq oyatpaqta. Házirgi waqıtta kitaptıń úshinshi tomı ushın materiallardı toplap atırmız.

Ushırasıwda jazıwshı óziniń dóretiwshilik jumısları, ustazları, qaraqalpaq ádebiyatı haqqındaǵı oy-pikirleri, aldaǵı maqsetleri haqqındaǵı pikirleri menen bólisti.

Jaslar jazıwshınıń yumor-satiralıq shıǵarmaları, «Eki dúnyanıń áweresi» saxnalıq shıǵarması, televidenie arqalı efirge berilgen «Máwrit» kórsetiwi, jazıwshınıń basshılıǵında súwretke alınǵan kinofilmler haqqında ózlerin qızıqtırǵan sorawlarǵa juwaplar aldı.

NMPI baspasóz xızmeti.