Ájiniyaz atındaǵı Nókis mámleketlik pedagogikalıq institutında ótkerilgen usı atamadaǵı ushırasıw hám dógerek sáwbetinde taraw qánigeleri hám studentler búgingidey globallasıw sharayatında jaslar tárbiyasınıń áhmiyetli máselelerin birgelikte dodalap, óz ara pikir almastı.

Ilajǵa paytaxtımızdaǵı Imam iyshan Muhammed jámáátlik meshiti imam orınbasarı A.Jolawshiev, institut rektorınıń jaslar máseleleri boyınsha másláhátshisi O.Srajatdinov, Korrupciyaǵa qarsı gúresiw «Komplaens qadaǵalaw» sistemasın basqarıw bólimi baslıǵı P.Xojabekov, profilaktikalıq inspektor M.Narımbetova, Shet tilleri fakulteti professor-oqıtıwshıları, tyutorları hám studentleri qatnastı.

Ushırasıwdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov basqarıp bardı.

Dógerek sáwbetinde jaslar arasında jınayatshılıq hám huqıqbuzarlıqlar profilaktikası, oqıw procesinde korrupciyalıq jaǵdaylardıń aldın alıw, sociallıq tarmaqlar hám internet resurslarınan aqılǵa uǵras paydalanıw sıyaqlı máselelerde qánigeler anıq turmıslıq mısallar menen túsindiriw hám úgit-násiyat jumısların alıp bardı.

Ilajda studentler kóterilgen máseleler boyınsha ózleriniń pikir hám usınısların bildirip, qızıqtırǵan sorawlarına juwaplar aldı.

NMPI baspasóz xızmeti.