Usı jıldıń 20-aprel kúni Ájiniyaz atındaǵı Nókis mámleketlik pedagogikalıq institutınıń Sırtqı bilimlendiriw bólimi Gumanitar hám jámiyetlik pánlerdi aralıqtan oqıtıw kafedrasında «Úzliksiz bilimlendiriw sistemasında aralıqtan oqıtıwdıń integraciyası» atamasındaǵı III xalıqaralıq ilimiy-teoriyalıq konferenciya bolıp ótti.

Konferenciya tek ǵana óziniń teması menen emes, sonıń menen birge, qatnasıwshılardıń kóp sanlılıǵı menen de áhmiyetli boldı. Toplamda júzden artıq maqalalar jámlengen bolıp, olar arasında Rossiya Federaciyası, Qazaqstan, Qırǵızstan, Ázerbayjan hám Túrkiya mámleketlerinen qabıl etilgen ilimiy  maqalalar bar.

Konferenciya 4 sekciyadan ibarat bolıp, bular:

1-sekciya «Social-gumanitar pánler»;

2-sekciya «Anıq hám tábiyiy pánler»;

3-sekciya «Pitch sekciya»;

4-sekciya «Dóńgelek stol».

Konferenciyanıń plenar májlisi saat 10:00 de bolıp ótti. Májliske institutımızdıń professor-oqıtıwshıları qatnastı. Sonıń menen birge, Abay atındaǵı Qazaq milliy pedagogika universitetinen ilim doktorı, docent Taubaeva Galiya Zakaryanovna qatnastı.

Saat 14:00 de sekciya jumısları alıp barıldı. Birinshi hám ekinshi sekciyada professor-oqıtıwshılar ózleriniń bayanatları menen qatnastı. Sekciya soraw-juwap hám pikir alısıwlarǵa bay boldı. Pitch sekciyada Baslawısh tálim hám Mektepke shekemgi tálim baǵdarınıń professor-oqıtıwshıları tárepinen «Mektepke shekemgi hám baslawısh klass pedagoglardıń dóretiwshilik kompetentligi» temasında ámeliy jumıslar  kórsetip berildi. Konferenciyada pitch sekciya óziniń ayrıqshalıǵı menen konferenciya qatnasıwshılarınıń qızıǵıwshılıǵın arttırdı.

4-sekciyada «Bala tárbiyasına tásir etiwshi faktorlar bala tárbiyasına telefonnıń tásiri» temasında dóńgelek stol átirapında sáwbet bolıp ótti.

Maqalalardıń kópshiliginde házirgi zamanǵa say oqıtılatuǵın metodlardıń túrleri hám olardı paydalanıwdıń áhmiyetli tárepleri haqqında aytıp ótildi. Avtorlar ózlerinıń ilimiy tezislerinde teoriya menen ámeliyattı baylanıstırǵan.

Ulıwma alǵanda III Xalıqaralıq ilimiy-teoriyalıq konferenciya aralıqtan oqıtıw sistemasında hám úzliksiz bilimlendiriw sistemasında úlken áhmiyetke iye.

Konferenciyanıń shólkemlestiriliwi zamanagóy bilimlendiriw sistemasın dúziw, bilim sıpatın asırıw, ilim ǵayratkerlerin jaqınlastırıwǵa hám shet el mámleketleri menen óz-ara tájiriybe almasıwǵa óz úlesin qostı.

G.M.Ganiyeva,

Ájiniyaz atındaǵı NMPI Gumanitar hám jámiyetlik pánlerdi aralıqtan oqıtıw kafedrası stajyor-oqıtıwshısı.