Ájiniyaz atındaǵı Nókis mámleketlik pedagogikalıq institutında «Rektor hám jaslar ushırasıwı» hápteligi sheńberinde institut rektorı Bayrambay Otemuratov student-jaslar menen ushırasıp, ashıq sáwbetlesiw ótkerdi.

Ushırasıwda institut rektorı elimizde pedagog kadrlar tayarlaw baǵdarındaǵı ámelge asırılıp atırǵan reformalar hám olardıń nátiyjeleri haqqında maǵlıwmatlar berdi.

Atap ótilgenindey, búgingidey globallasıw sharayatında Úshinshi Renessanstıń tiykarın jaratatuǵın áwladlardıń tálim-tárbiyası mámleketimiz hám jámiyetimiz aldında turǵan baslı máselelerdiń biri bolıp qalmaqta.

Bunda, ásirese, mektepke shekemgi hám xalıq bilimlendiriw tarawlarına pedagog kadrlardı tayarlap beriwde ornı girewli bolǵan Nókis mámleketlik pedagogikalıq institutında bilimlendiriwdiń sapasın jetilistiriw, zamanagóy texnologiyalar, oqıtıw usılların ámeliyatqa engiziw arqalı joqarı potenciallı kadrlar tayarlawǵa ayrıqsha itibar qaratılmaqta.

Institut rektorı bul baǵdarda Ózbekstan Respublikası Prezidentiniń «Pedagogikalıq bilimlendiriwdiń sapasın arttırıw hám pedagog kadrlar tayarlaytuǵın joqarı bilimlendiriw mákemeleriniń jumısların bunnan bılay da rawajlandırıw ilajları haqqında»ǵı qararınıń áhmiyetine ayrıqsha toqtaldı.

Ushırasıwda rektor Bayrambay Otemuratov institutta oqıtıwdıń sapasın arttırıw ushın ámelge asırılatuǵın jumıslar haqqında da jaslarǵa maǵlıwmatlar berdi.

Student-jaslar rektor menen ótkerilgen ushırasıwda institutta oqıw menen birgelikte materiallıq-texnikalıq bazanı jetilistiriw, ádebiy kitaplar hám oqıw ádebiyatların kóbeytiw, sport hám salamatlastırıw ilajların ótkeriw jáne basqa máseleler boyınsha sorawlarına juwaplar aldı hám pikir-usınısların bildirdi.

NMPI baspasóz xızmeti.