Búgin, 11-sentyabr kúni Ájiniyaz atındaǵı Nókis mámleketlik pedagogikalıq institutında «Bes baslama olimpiadası» sheńberinde sporttıń voleybol, mini futbol hám stol tennisi túrleri boyınsha fakultetler kesiminde jarıslarǵa start berildi.

Ózbekstan Respublikası Prezidentiniń pármanı menen tastıyıqlanǵan 2022-2026-jıllarǵa mólsherlengen Jańa Ózbekstannıń rawajlanıw strategiyasında belgilengen wazıypalardı ámelge asırıw, institut studentlerin sport ilajlarına keńnen tartıw, olar arasında jarıslar shólkemlestiriw, studentlerdiń fizikalıq aktivlik dárejesin arttırıw, instituttaǵı sport sekciyaları hám dógerekleriniń jumısların rawajlandırıwǵa kómeklesiw, studentlerdiń bos waqıtlarında sport penen shuǵıllanıwı ushın sharayat jaratıw maqsetinde ótkerilip atırǵan jarıslarǵa jaslar belsene qatnaspaqta.

Jarıslardı shólkemlestiriw hám ótkeriw ushın institutta qızǵın tayarlıqlar alıp barıldı. Dene mádeniyatı fakultetiniń tájiriybeli professor-oqıtıwshılarınan ibarat shólkemlestiriw komiteti hám tóreshiler quramı aǵzaları jarıslardı joqarı dárejede shólkemlestiriw jumısların alıp bardı.

«Bes baslama olimpiadası» sheńberinde jarıslar hár bir fakultet kesiminde, akademiyalıq toparlar arasında 20-sentyabrge shekem tastıyıqlanǵan keste tiykarında ótkeriliwi belgilendi.

Jarıslar student-qızlar arasında voleybol, erler arasında mini futbol, sonday-aq, erler hám qızlar arasında stol tennisi sport túrlerinen ótkerilmekte.

«Bes baslama olimpiadası» sheńberindegi jarıslar dawam etpekte.

NMPI baspasóz xızmeti.