Búgin, 13-sentyabr kúni Ájiniyaz atındaǵı Nókis mámleketlik pedagogikalıq institutında Amerika Qurama Shtatlarınıń «English Language Fellow Program» joybarınıń qánigesi Greys Kudlak penen ushırasıw bolıp ótti.

Ushırasıwda instituttıń oqıw isleri boyınsha prorektorı wazıypasın waqıtsha atqarıwshısı A.Abdiev, ilimiy isler hám innovaciyalar boyınsha prorektorı R.Eshmuratov, inglis tili hám ádebiyatı kafedrasınıń docentleri D.Mamırbaeva hám N.Jalǵasovlar amerikalı qánige menen institutta studentlerge sabaq ótiw boyınsha pikir almastı.

Greys Kudlak 2023-2024-oqıw jılında – usı jıldıń sentyabr ayınan baslap 10 ay dawamında instituttıń inglis tili hám ádebiyatı tálim baǵdarınıń studentlerine sabaq ótiwi menen birge, professor-oqıtıwshılar menen háptelik metodikalıq seminarlar, studentler ushın qosımsha dógerekler shólkemlestiriwi jobalastırılǵan.

Greys Kudlak AQShtıń Makgill universitetinde bakalavriatura, Uestern Governors universitetinde magistratura basqıshların tabıslı pitkergen, sonday-aq, sońǵı 5 jıl dawamında Gonkong, Kanada, Qırǵızstan, Qubla Koreya sıyaqlı mámleketlerde tájiriybesin arttırǵan.

2022-2023-oqıw jılında Buxara mámleketlik universitetinde bir jıl dawamında sabaq ótken.

Maǵlıwmat ornında atap ótiw orınlı, AQSh Mámleketlik Departamenti tárepinen qarjılandırılatuǵın «English Language Fellow Program» joybarı akademiyalıq almasıw hám bilimlendiriw tarawındaǵı úlken joybarlardıń biri bolıp tabıladı.

NMPI baspasóz xızmeti.