Ájiniyaz atındaǵı Nókis mámleketlik pedagogikalıq institutında «Ilim, texnika hám bilimlendiriwde innovaciyalıq texnologiyalar: mashqala hám sheshimler» atamasındaǵı respublikalıq ilimiy-teoriyalıq konferenciya bolıp ótti.

Ilaj qatnasıwshıları instituttıń texnologiyalıq tálim kafedrası professor-oqıtıwshıları hám studentleriniń oqıw jáne ámeliyat barısında islegen buyımları, qol óneri úlgileri, jetiskenlikleri haqqındaǵı kórgizbe menen tanıstı.

Konferenciyaǵa respublikamızdıń jetekshi joqarı oqıw orınları, ilimiy-izertlew oraylarınan ilimpazlar, professor-oqıtıwshılar, izleniwshiler qatnastı.

Ilajda institut rektorı wazıypasın waqıtsha atqarıwshısı Q.Qodirov sózge shıǵıp, barlıq qatnasıwshılardı qutlıqladı hám konferenciya jumıslarına tabıslar tiledi.

Konferenciyanıń ashılıw plenar májilisinde oqıwshılardı kásip tańlawǵa baǵdarlaw sistemasın jetilistiriw hám texnologiyalıq bilimlendiriwdi rawajlandırıw, jámiyettegi institucionallıq ózgerisler dáwirinde texnologiyalıq bilim beretuǵın muǵallimlerdi tayarlaw mashqalaları, studentlerdiń texnikalıq dóretiwshilik qábiletlerin jetilistiriwde texnologiyalıq pánler kompetenciyalarınıń úzliksizligin úyreniwdiń ilimiy-metodikalıq analizi, texnologiyalıq bilimlendiriwde aldınǵı sırt el tájiriybeleri hám usı sıyaqlı temalarda bayanatlar jasaldı.

Ekonomikalıq kózqarastan alıp qaraǵanımızda, zamanagóy globallasıw, sanlı ekonomika hám Jańa Ózbekstandı qurıw sharayatında rawajlanǵan mámleketlerdiń tájiriybesinde innovaciyalıq jumıslardı shólkemlestiriw hám qollap-quwatlaw boyınsha xalıqaralıq tájiriybeni úyreniw máselesi tek ǵana kárxanalar dárejesinde emes, sonıń menen birge, joqarı oqıw orınlarında qánigeler tayarlaw hám olardıń innovaciyalıq jumısların jetilistiriwge de xızmet etedi. Al pedagogikalıq kózqarastan bolsa, zamanagóy bilimlendiriw sistemasında ámelge asırılıp atırǵan innovaciyalıq processler, eń aldı menen, insan turmısınıń barlıq tarawlarında sanlı texnologiyalardan jedel paydalanıw menen baylanıslı, sonday-aq, birinshi gezekte bilimlendiriwdiń sapası hám nátiyjeliligin arttırıwǵa baǵdarlanǵan.

Ilajda bayanatshılar tárepinen ilim, texnika hám bilimlendiriwde innovaciyalıq texnologiyalardı keńnen qollanıwdıń áhmiyeti, bul baǵdardaǵı mashqalalar hám olardıń sheshimleri boyınsha bildirilgen pikir-usınıslar dodalandı.

Konferenciya óz jumısın anıq hám tábiyiy pánlerdi oqıtıwda innovaciyalıq texnologiyalar, texnikalıq pánlerdi oqıtıwda aldınǵı sırt el tájiriybeleri, súwretlew óneri hám sızıw pánlerin oqıtıwda mashqalalar hám sheshimler sıyaqlı sekciyalarda dawam ettirdi.

NMPI baspasóz xızmeti.