Búgin, 14-iyul kúni 2024-2025-oqıw jılında joqarı hám professional bilimlendiriw mákemelerine oqıwǵa kiriw test sınaqları baslandı.

Nókis qalasındaǵı test sınaqları ótkeriletuǵın orınlar qatarında Respublikalıq oyın túrleri hám jeńil atletika boyınsha qánigelestirilgen balalar hám jas óspirimler sport mektebinde de abiturientler test sınaqlarına qatnaspaqta.

Bul jerde Ájiniyaz atındaǵı Nókis mámleketlik pedagogikalıq institutı tárepinen abiturientlerdiń ata-anaları ushın kútiw orınları, test procesin onlayn baqlaw imkaniyatı, sonday-aq, basqa da zárúr sharayatlar jaratıldı.

Qaraqalpaqstan Respublikası Joqarǵı Keńesiniń komitet baslıǵı Tájibay Romanov, Qaraqalpaqstan Respublikası Joqarı bilimlendiriw, ilim hám innovaciyalar ministri Batırbek Qayıpbergenov, Ózbekstan Respublikası Joqarı bilimlendiriw, ilim hám innovaciyalar ministrligi janındaǵı Student hám oqıwshılardıń jámiyetlik belsendiligin arttırıw orayınıń baslıǵı Ravshanbek Xudayberganov, sonday-aq, institut rektorı wazıypasın waqıtsha atqarıwshısı Quvondiq Qodirov abiturientlerdiń ata-anaları menen sáwbetlesip, olardıń perzentlerine test sınaqlarında áwmetler tiledi.

Sonıń menen birge, mámleketimizde Prezidentimiz basshılıǵında jaslardıń bilim alıwı, kásip-óner úyreniwi, qábiletlerin júzege shıǵarıwı ushın jaratılıp atırǵan imkaniyatlar haqqında aytıp ótti.

– Búgin qızım yuridika tálim baǵdarına test tapsırıp atır. Test sınaqlarına jaqsı tayarlıqlar kórdi. Áwmet tilep, tilekles bolıp otırman. Bul jerde ata-analardıń test procesin onlayn baqlap otırıwı ushın barlıq sharayatlar jaratılǵan. Bunıń ushın barlıq shólkemlestiriwshilerge minnetdarshılıq bildiremen. Barlıq abiturient jaslarǵa áwmet tileymen, – deydi nókisli Sársengúl Bekjanova.

Maǵlıwmat ornında atap ótiw kerek, test sınaqları kúnine eki smenada –
1-smena 08:00 den 11:00 ge shekem, al 2-smena 15:00 den 18:00 ge shekem bolıp ótedi.

Qaraqalpaqstan Respublikasında joqarı hám professional bilimlendiriw mákemelerine oqıwǵa kiriw test sınaqları usı jıldıń 25-iyul kúnine shekem dawam etedi.

Test sınaqları tolıq videobaqlaw arqalı onlayn translyaciya etilmekte hám processti test2024.uz saytı arqalı onlayn baqlap barıw imkaniyatı jaratılǵan.

NMPI baspasóz xızmeti.