Bugun, 14-iyul kuni 2024-2025-oʻquv yilida oliy va professional taʼlim muassasalariga oʻqishga kirish test sinovlari boshlandi.

Nukus shahridagi test sinovlari oʻtkaziladigan joylar qatorida Respublika oʻyin turlari va yengil atletika boʻyicha ixtisoslashtirilgan bolalar va oʻsmirlar sport maktabida ham abituriyentlar test sinovlarida ishtirok etmoqda.

Bu yerda Ajiniyoz nomidagi Nukus davlat pedagogika instituti tomonidan abituriyentlarning ota-onalari uchun kutish joylari, test jarayonini onlayn kuzatish imkoniyati, shuningdek, boshqa da zarur sharoitlar yaratildi.

Qoraqalpogʻiston Respublikasi Joʻqorgʻi Kengesi qoʻmita raisi Tajibay Romanov, Qoraqalpogʻiston Respublikasi Oliy taʼlim, fan va innovatsiyalar vaziri Batirbek Qayipbergenov, Oʻzbekiston Respublikasi Oliy taʼlim, fan va innovatsiyalar vazirligi huzuridagi Talaba va oʻquvchilarning ijtimoiy faolligini oshirish markazi rahbari Ravshanbek Xudayberganov, shuningdek, institut rektori vazifasini vaqtincha bajaruvchisi Quvondiq Qodirov abituriyentlarning ota-onalari bilan suhbatlashib, ularning farzandlariga test sinovlarida omad tiladi.

Shu bilan birga, mamlakatimizda Prezidentimiz rahbarligida yoshlarning bilim olishi, kasb-hunar oʻrganishi, qobiliyatlarini yuzaga chiqarishi uchun yaratilayotgan imkoniyatlar toʻgʻrisida aytib oʻtdi.

– Bugun qizim yuridika taʼlim yoʻnalishiga test topshirmoqda. Test sinovlariga yaxshi tayyorgarlik koʻrdi. Omad tilab, tilakdosh boʻlib keldim. Bu yerda ota-onalarning test jarayonini onlayn kuzatib oʻtirishi uchun barcha sharoitlar yaratilgan. Bu uchun barcha tashkilotchilarga minnatdorlik bildiraman. Barcha abituriyent yoshlarga omad tilayman, – deydi nukuslik Sarsengul Bekjanova.

Maʼlumot oʻrnida taʼkidlash joiz, test sinovlari kuniga ikki smenada – 1-smena 08:00 dan 11:00 gacha, 2-smena esa 15:00 dan 18:00 gacha boʻlib oʻtadi.

Qoraqalpogʻiston Respublikasida oliy va professional taʼlim muassasalariga oʻqishga kirish test sinovlari shu yilning 25-iyul kunigacha davom etadi.

Test sinovlari toʻliq videokuzatuv orqali onlayn translyatsiya qilinmoqda hamda jarayonni test2024.uz sayti orqali onlayn kuzatib borish imkoniyati yaratilgan.

NukusDPI matbuot xizmati.