Berdaq atındaǵı Qaraqalpaq mámleketlik universitetinde «TechnoWays» texnologiyalıq rawajlanıw marafonınıń respublikalıq basqıshı baslandı.

Ilajǵa Qaraqalpaqstan Respublikası Ministrler Keńesi Baslıǵınıń sanlastırıw boyınsha másláhátshisi Madiyar Elmuratov, Ózbekstan Respublikası Innovaciyalardı engiziw hám texnologiyalar transferi milliy ofisiniń bas direktorı Farhod Jumaev, Qaraqalpaqstan Respublikası Joqarı bilimlendiriw, ilim hám innovaciyalar ministri Batırbek Qayıpbergenov, joqarı oqıw orınlarınıń basshıları, isbilermenler, marafonnıń Qaraqalpaqstan Respublikası, Tashkent qalası hám wálayatlardaǵı joqarı oqıw orınları jáne aymaqlıq basqıshlarında jeńimpaz bolǵan 100 den aslam innovator jaslar, sonday-aq, keń jámiyetshilik hám ǵalaba xabar qurallarınıń wákilleri qatnastı.

Ashılıw máresiminde atap ótilgenindey, «TechnoWays» texnologiyalıq rawajlanıw marafonı joqarı oqıw orınlarındaǵı ilimge qushtar, qábiletli jaslardıń innovaciya, startap, texnologiya, baǵdarlamalastırıw boyınsha bilimlerin arttırıw, joybarlar jaratıw hám kommerciyalastırıw kónlikpelerin qáliplestiriwge baǵdarlawda úlken áhmiyetke iye bolıp tabıladı.

Marafonnıń joqarı oqıw orınları jáne aymaqlıq basqıshları baǵdarlamalıq támiynat hám texnologiyalıq sheshim baǵdarları boyınsha ilimiy hám innovaciyalıq ideyalar, joybarlar, sonday-aq, baslamaları bolǵan 30 jasqa shekemgi mıńlaǵan perspektivalı jáne innovator jaslardı birlestire alǵan iri joybarlardıń birine aylandı.

Marafonnıń dáslepki kúninde qatnasıwshılar «3D modellestiriw» baǵdarında ámeliy túrde innovaciyalıq ideyalar jaratıw boyınsha bilim hám kónlikpelerge iye bolmaqta.

Maǵlıwmat ornında atap ótiw kerek, 11-oktyabrge shekem dawam etetuǵın marafon dawamında qatnasıwshılar tiyisli baǵdarlar kesiminde ózleriniń innovaciyalıq hám baǵdarlamalıq joybarlarınıń prezentaciyaların ótkeredi.

Qatnasıwshılardıń innovaciyalıq joybarları tiyisli taraw qánigelerinen ibarat ekspertler quramı tárepinen belgilengen kriteriyalar tiykarında bahalanadı.

Sonday-aq, marafon sheńberinde qatnasıwshılar menen birgelikte hár qıylı mádeniy-aǵartıwshılıq ilajları shólkemlestiriledi.

«TechnoWays» texnologiyalıq rawajlanıw marafonı respublikalıq basqıshı shólkemlestiriw toparınıń málimleme xızmeti.