Berdaq nomidagi Qoraqalpoq davlat universitetida “TechnoWays” texnologik rivojlanish marafoni respublika bosqichi boshlandi.

Tadbirda Qoraqalpogʻiston Respublikasi Vazirlar Kengashi Raisining raqamlashtirish boʻyicha maslahatchisi Madiyar Yelmuratov, Oʻzbekiston Respublikasi Innovatsiyalarni joriy qilish va texnologiyalar transferi milliy ofisi bosh direktori Farhod Jumayev, Qoraqalpogʻiston Respublikasi Oliy taʼlim, fan va innovatsiyalar vaziri Batirbek Qayipbergenov, oliy taʼlim muassasalari rahbarlari, tadbirkorlar, marafonning Qoraqalpogʻiston Respublikasi, Toshkent shahri hamda viloyatlardagi oliy taʼlim muassasalari va hududiy bosqichlarida gʻolib boʻlgan 100 dan ortiq innovator yoshlar, shuningdek, keng jamoatchilik va ommaviy axborot vositalari vakillari ishtirok etdi.

Ochilish marosimida taʼkidlanganidek, “TechnoWays” texnologik rivojlanish marafoni oliy taʼlim muassasalaridagi ilmga chanqoq, iqtidorli yoshlarning innovatsiya, startap, texnologiya, dasturlash borasidagi bilimlarini oshirish, loyihalar yaratish hamda tijoratlashtirish koʻnikmalarini shakllantirishga yoʻnaltirishda katta ahamiyat kasb etadi.

Marafonning oliy taʼlim muassasalari va hududiy bosqichlari dasturiy taʼminot va texnologik yechim yoʻnalishlari boʻyicha ilmiy hamda innovatsion gʻoyalar, loyihalar, shuningdek, tashabbuslari bor 30 yoshgacha boʻlgan minglab istiqbolli hamda innovator yoshlarni birlashtira olgan yirik loyihalardan biriga aylandi.

Marafonning dastlabki kunida ishtirokchilar “3D modellashtirish” yoʻnalishida amaliy tarzda innovatsion gʻoyalar yaratish boʻyicha bilim va koʻnikmalarga ega boʻlmoqda.

Maʼlumot oʻrnida taʼkidlash joiz, 11-oktabrgacha davom etadigan mazkur marafon davomida ishtirokchilar tegishli yoʻnalishlar kesimida oʻzlarining innovatsion hamda dasturiy loyihalari taqdimotini oʻtkazadi.

Ishtirokchilarning innovatsion loyihalari tegishli soha mutaxassislaridan iborat ekspertlar tarkibi tomonidan belgilangan meʼzonlar asosida baholanadi.

Shuningdek, marafon doirasida ishtirokchilar bilan birgalikda har xil madaniy-maʼrifiy tadbirlar tashkil etiladi.

“TechnoWays” texnologik rivojlanish marafoni respublika bosqichi tashkiliy guruhi axborot xizmati.