Usı jıldıń 9-11-oktyabr kúnleri Tashkent qalasındaǵı CAEx – Ózbekstan xalıqaralıq kórgizbeler orayında «InnoWeek – 2025» VIII Xalıqaralıq innovaciyalıq ideyalar hápteligi bolıp ótpekte.

Háptelikte jergilikli hám xalıqaralıq iri kompaniyalar, joqarı bilimlendiriw hám ilimiy-izertlew mákemeleri, venchur fondlar, qarjı shólkemleri, xalıqaralıq maǵlıwmatlar bazalarınıń wákilleri qatnaspaqta.

Áhmiyetlisi, bul xalıqaralıq ilajǵa Ájiniyaz atındaǵı Nókis mámleketlik pedagogikalıq institutı ilimiy isler hám innovaciyalar boyınsha prorektorı Quwanıshbay Seytnazarov basshılıǵındaǵı institut delegaciyası ózleriniń ilimiy-innovaciyalıq joybarları menen qatnasıp atır.

Atap aytqanda, prorektor Quwanıshbay Seytnazarov basshılıǵında student-jaslar menen birgelikte islep shıǵılǵan qaraqalpaq ımlap túsindiriw tilin jasalma intellekt járdeminde avtomatlastırılǵan túrde tanıp alıw hám awdarıw múmkinshiligin beretuǵın «Karakalpak Sign Language», aralıqtan zondlaw (DZZ) texnologiyalarına tiykarlanǵan, awıl xojalıǵı jerleriniń topıraq jaǵdayı, ósimliklerdiń rawajlanıwı hám ónimdarlıǵın anıqlaw imkaniyatın beretuǵın «Remote Sensing» platformaları, sonday-aq, mektep hám balalar baqshalarına mólsherlengen zamanagóy bilimlendiriw platforması «Smart School» joybarları, sonıń menen birge, ximiya kafedrasınıń docenti Alım Asamatdinov tárepinen islep shıǵılǵan, órtke hám suw shıdamlı, cement sińdirilgen, iykemlesiwshilik ózgeshelikke iye, jeńil, iyiliwsheń «Cement tawar» joybarı kórgizbede qatnasıp atırǵan xalıqaralıq hám jergilikli ekspertlerde úlken qızıǵıwshılıq oyatpaqta.

Maǵlıwmat ushın, háptelik sheńberinde qatnasıwshılar ushın ilim, texnologiya hám innovaciyalar tarawındaǵı bilim jáne kónlikpelerin arttırıw, sonday-aq, xalıqaralıq tájiriybe almasıw imkaniyatın beretuǵın 30 dan aslam ilimiy-ámeliy ilajlar shólkemlestiriw rejelestirilgen.

NMPI baspasóz xızmeti.