Ájiniyaz atındaǵı Nókis mámleketlik pedagogikalıq institutı Jaslar awqamı baslanǵısh shólkemi baslaması menen student-jaslardıń bos waqıtların mazmunlı ótkeriw, joqarı mánawiyatlı, erkin pikirleytuǵın jaslardı tárbiyalaw, olardıń intellektual oylaw qábiletin jetilistiriw hám qollap-quwatlaw maqsetinde «Intellektual olimpiada» shólkemlestirildi.

Búgin, 2-aprel kúni «Zakovat» hám «Zakovat Quiz» boyınsha bolıp ótken intellektual oyınlarǵa barlıq fakultetlerden bakalavr tálim baǵdarları studentleri, sonday-aq, magistratura qánigeliklerinde bilim alıp atırǵan magistrant jaslardan dúzilgen 32 komanda qatnastı.

«Intellektual olimpiada»nıń ashılıwında institut rektorı w.w.a. Quvondiq Qodirov qatnasıp, barlıq jaslarǵa áwmet tiledi. Bunday jarıslardı turaqlı ótkeriw hám qábiletli jaslar barqulla qollap-quwatlanatuǵının bildirdi.

Esletip ótemiz, «Intellektual olimpiada» qatnasıwshıları 3-aprel kúni «Breyn-ring» intellektual oyınında óz imkaniyatların sınaqtan ótkeredi.

Hár bir intellektual oyında jeńimpaz bolǵan komandalar tiyisli ballardı toplaydı hám ulıwmalıq ballar jıyındısına muwapıq 1-, 2-, 3-orınlar anıqlanadı.

Jeńimpazlar hám sıylı orın iyeleri diplom jáne bahalı sawǵalar menen sıylıqlanadı.

NMPI baspasóz xızmeti.