Ájiniyaz atındaǵı Nókis mámleketlik pedagogikalıq institutı Tábiyiy pánler fakultetinde «Ashıq esikler kúni» sheńberinde student-jaslardıń ata-anaları menen ushırasıw bolıp ótti.

Ilajdıń tiykarǵı maqseti – oqıw procesi, jaratılǵan sharayatlar hám studentlerdiń bilim alıw imkaniyatları menen ata-analardı jaqınnan tanıstırıw, sonday-aq, olar menen jaslar tálim-tárbiyasında birgelikte ámelge asırılatuǵın jumıslardı dodalawdan ibarat boldı.

Ushırasıwǵa institut rektorı w.w.a. Quvondiq Qodirov qatnasıp, ata-analar menen ashıq pikirlesiw alıp bardı.

Ushırasıw dawamında fakultet basshıları tárepinen oqıw procesin shólkemlestiriw, zamanagóy laboratoriyalar, innovaciyalıq texnologiyalar tiykarında alıp barılıp atırǵan sabaqlar haqqında tolıq maǵlıwmat berildi. Sonday-aq, studentlerdiń ilimiy-izertlew jumısları, olardıń tabısları hám aldaǵı rejeleri haqqında sóz etildi.

Ilaj sheńberinde fakultet studentleriniń qolǵa kirgizgen tabısları sáwlelegen kórgizbe shólkemlestirildi. Sonday-aq, belsendi studentlerdiń ata-analarına minnetdarshılıq xatları tapsırıldı. Ata-analar ózlerin qızıqtırǵan sorawlarǵa juwaplar aldı.

Ushırasıw ata-analar menen turaqlı baylanıslardı jolǵa qoyıw, óz ara isenim hám birge islesiwdi bekkemlewge xızmet etti.

NMPI baspasóz xızmeti.