Usı jıldıń 9-aprel kúni Berdaq atındaǵı Qaraqalpaq mámleketlik akademiyalıq muzıkalı teatrında Qaraqalpaqstan Respublikası Konstituciyası qabıl etilgeniniń 33 jıllıǵına baǵıshlanǵan bayram saltanatı ótkerildi.

Onda Joqarǵı Keńestiń deputatları, ministrlikler, mákeme hám kárxanalar, oqıw orınları, huqıq qorǵaw uyımlarınıń basshıları, student-jaslar, jámiyetlik shólkemler, ǵalaba xabar qurallarınıń wákilleri qatnastı.

Bayram saltanatında dáslep Ózbekstan hám Qaraqalpaqstan Respublikalarınıń mámleketlik gimnleri jańladı.

Qaraqalpaqstan Respublikası Joqarǵı Keńesiniń Baslıǵı Amanbay Orınbaev jıynalǵanlardı Qaraqalpaqstan Respublikası Konstituciyası qabıl etilgeniniń 33 jıllıǵı múnásibeti menen qızǵın qutlıqladı.

Ilajda atap ótilgenindey, Konstituciyamız – bul kóp milletli xalqımızdıń awızbirshiligin hám doslıǵın bekkemlewshi, olardı ullı dóretiwshilik islerge baslawshı tiykarǵı hújjet esaplanadı.

Elimizdiń rawajlanıw basqıshlarına názer taslar ekenbiz, ekonomikamızdıń jıldan-jılǵa bekkemlenip baratırǵanı, xalıqtıń sociallıq jasaw sharayatınıń jaqsılanıp atırǵanı Konstituciyamızǵa tiykar etip alınǵan, tereń hám puqta oylanǵan iygilikli maqsetlerdiń nátiyjesi bolıp sanaladı.

Usı orında ayrıqsha atap ótiwimiz tiyis, elimizde húrmetli Prezidentimiz basshılıǵında Qaraqalpaqstan Respublikası boyınsha ayrıqsha qabıl etilgen qararlar, mámleketlik baǵdarlamalar turmısımızda úlken orın iyelep kelmekte. Búgingi kúnde respublikamızda usı qabıl etilgen qarar hám pármanlar, mámleketlik baǵdarlamalar tiykarında úlken qurılıs-ońlaw hám abadanlastırıw jumısları, salmaqlı dóretiwshilik baslamalar ámelge asırılmaqta.

Ilaj kórkem óner sheberleri tárepinen tayarlanǵan koncert baǵdarlaması menen dawam etti.

Qaraqalpaqstan Respublikası Joqarǵı Keńesiniń Málimleme xızmeti.