Ájiniyaz atındaǵı Nókis mámleketlik pedagogikalıq institutında student-jaslar qatnasıwında kiberjınayatlardıń aldın alıw, málimleme qáwipsizligin támiyinlew jáne internet tarmaǵınan durıs hám qáwipsiz paydalanıw mádeniyatın qáliplestiriwge arnalǵan ushırasıw shólkemlestirildi.

Ushırasıwǵa Qaraqalpaqstan Respublikası Ishki isler ministrligi Kiberjınayatlarǵa qarsı gúresiw basqarması qánigeleri – aǵa leytenant Atabek Xojaev hám Alibek Ótemuratov, jaslar tálim-tárbiyasına juwapkerler, student-jaslar qatnastı.

Ilajdı institut rektorı w.w.a. Quvondiq Qodirov sózge shıǵıp, búgingi kúnde keń tarqalıp atırǵan kiberjınayatlar, sonıń ishinde, aldawshılıq, jeke maǵlıwmatlardı urlaw, zıyanlı baǵdarlamalar hám internet arqalı júz berip atırǵan basqa huqıqbuzarlıqlar, olardıń aqıbetleri haqqında aytıp ótti.

Ushırasıw dawamında qánigeler tárepinen studentlerge sociallıq tarmaqlardan paydalanıwda dıqqatlı bolıw, jeke maǵlıwmatlardı qorǵaw, belgisiz siltemeler hám gúman payda etetuǵın xabarlardan saqlanıw boyınsha áhmiyetli usınıslar berildi. Sonday-aq, kiberqáwipsizlikti támiyinlewde hár bir paydalanıwshınıń juwapkershiligi ayrıqsha atap ótildi.

Ilaj ashıq sáwbetlesiw tárizinde ótip, juwapkerler hám student-jaslar ózlerin qızıqtırǵan sorawlarǵa qánigelerden tolıq juwap aldı.

NMPI baspasóz xızmeti.