Ájiniyaz atındaǵı Nókis mámleketlik pedagogikalıq institutında Jaslar awqamı baslanǵısh shólkemi baslaması menen student-jaslardıń innovaciyalıq ideyaların qollap-quwatlaw hám startap joybarların ámeliyatqa engiziw maqsetinde «Jaslar startap akademiyası» shólkemlestirilmekte.

Ózbekstan Respublikası Prezidentiniń «Startaplardı qollap-quwatlawdıń kompleksli ekosistemasın engiziw ilajları haqqında»ǵı qararında belgilengen wazıypalardan kelip shıǵıp ámelge asırılıp atırǵan bul ilajlar jaslardıń perspektivalı baslamaları hám joybarların rawajlandırıwǵa baǵdarlanǵan.

Usı baslama sheńberinde instituttıń startap joybarlarǵa qızıǵıwshılıǵı bolǵan student-jasları menen ushırasıw ótkerilip, onda Jaslar awqamı baslanǵısh shólkemi jetekshisi Erniyaz Qasımov hám «Jaslar startap akademiyası»nıń bas koordinatorı Zilola Allakova tárepinen startap joybarlardı jaratıw basqıshları, investorlardı tartıw, joybarlardı qarjılandırıw hám ámeliy nátiyjelerge erisiw jolları boyınsha usınıslar berildi.

Sonday-aq, student-jaslar óz startap joybarların tanıstırıp, orın alıp atırǵan mashqalalar hám usınısların bildirdi. Olardıń baslamaların qollap-quwatlaw, zárúr sharayatlar jaratıw hám perspektivalı joybarlardı ámeliyatqa engiziw boyınsha aldaǵı rejeler belgilep alındı.

NMPI baspasóz xızmeti.