Ájiniyaz atındaǵı Nókis mámleketlik pedagogikalıq institutı Filologiya fakulteti ózbek ádebiyatı kafedrasınıń baslaması menen milliy qádiriyatlarımızdı úgit-násiyatlaw maqsetinde «Folklor festivalı» shólkemlestirildi. Bul mádeniy-aǵartıwshılıq ilajda ózbek tili hám ádebiyatı tálim baǵdarınıń 1-basqısh studentleri belsene qatnasıp, óz ara dóretiwshilik jarısta qatnastı.

Festivaldıń tiykarǵı maqseti student-jaslarda xalıq awızeki dóretiwshiligi úlgileri arqalı milliy miyrasqa bolǵan húrmet hám qızıǵıwshılıqtı jáne de arttırıw, folklor janrlarınıń kórkem-estetikalıq áhmiyetin tereń túsindiriw, sonday-aq, jaslardıń saxna mádeniyatı hám dóretiwshilik potencialın rawajlandırıwdan ibarat boldı.

Bellesiw úsh shárt tiykarında shólkemlestirildi. Birinshi shárt – «Toy máresim folklorınıń aymaqlıq ózgesheligi» atamasında bolıp, onda qatnasıwshılar túrli aymaqlarǵa tán toy máresimleri, úrp-ádet hám dástúrlerdi folklor úlgileri tiykarında janlı tárizde súwretlep berdi. Studentler bul shıǵıp sóylewlerde milliy lipaslar, úrp-ádetler, máresim qosıqları arqalı aymaqlıq reń-báreńlikti ayqın sáwlelendiriwge háreket etti.

Ekinshi shárt xalıq qosıqlarınıń sáwleleniwine baǵıshlanıp, onda háyyiw, aytıs hám lapar qosıqları atqarıldı. Studentler xalıq awızeki dóretiwshiliginiń bul janrların sheberlik penen jırlap, olardıń mazmunın, tárbiyalıq hám estetikalıq áhmiyetin saxna arqalı ashıp berdi. Atqarıwlar tamashagóylerde úlken tásir qaldırdı.

Úshinshi shártte bolsa qatnasıwshılar belgili bir dástan úzindisi tiykarında saxna kórinisin kórsetti. Bul shıǵıwlar dawamında dástan qaharmanlarınıń obrazı, xalıqlıq ruwx hám dramalıq jaǵdaylar janlı túrde sáwlelendirildi. Saxna kórinisleri dóretiwshilik qatnas, kórkem talqılaw hám aktyorlıq sheberligi menen ajıralıp turdı.

Festival juwmaǵında tóreshiler quramı tárepinen bahalanıp, bellesiw nátiyjelerine bola 1-, 2- hám 3-orın jeńimpazları anıqlanıp, sıylıqlandı. Jeńimpazlarǵa estelik sawǵaları hám diplomlar tapsırıldı.

Ilaj dawamında ózbek ádebiyatı kafedrası oqıtıwshıları tárepinen palaw pisirilip, festival jáne de kóterińki ruwxta ótti. Qızǵın ortalıq, milliy taǵamlar hám folklor namaları ilajǵa ózgeshe payız baǵıshladı.

Sonday-aq, festivaldı shólkemlestiriw procesinde ózbek tili hám ádebiyatı qánigeligi 1-basqısh magistrantları da belsene qatnasıp, ilajdıń joqarı dárejede ótiwine múnásip úles qostı.

Bul folklor festivalı studentler ushın tek ǵana dóretiwshilik jarıs emes, al milliy miyrasımızdı tereńirek ańlaw, xalıq awızeki dóretiwshiliginiń biybaha úlgileri menen jaqınnan tanısıw imkaniyatın bergen áhmiyetli mádeniy ilaj sıpatında este qaldı.

NMPI baspasóz xızmeti.