Búgin, 22-aprel kúni Ájiniyaz atındaǵı Nókis mámleketlik pedagogikalıq institutında studentlerdiń bos waqtın mazmunlı ótkeriw, qábiletli, ziyrek jaslardı anıqlaw, olardıń ruwxıy dúnyasın bayıtıw hám talantlı jaslardı xoshametlew maqsetinde shólkemlestirilgen «Quwnaqlar hám ziyrekler» tańlawınıń final basqıshı bolıp ótti.

Finalda tańlawdıń birinshi basqıshında jeńimpaz dep tabılǵan hám finalǵa jollama alǵan:

– Filologiya fakultetiniń «Interfak»;
– Mektepke shekemgi hám baslawısh tálim fakultetiniń «Qarekeńniń qızları»;
– Anıq pánler fakultetiniń «APAN»;
– Tariyx fakultetiniń «Wa-ha-ha» komandaları qatnastı.

Final basqıshında qatnasıwshılar ulıwma 2 shárt: «Mınaw ne degen imkaniyat» hám «Juldızlı kórinis» shártleri tiykarında óz saxnalıq sheberliklerin kórsetti.

Solay etip, kóterińki ruwxta hám joqarı dárejede ótken tańlaw juwmaǵında Tariyx fakultetiniń «Wa-ha-ha» komandası 1-orındı iyelep, kóshpeli kubok jeńimpazı boldı.

Mektepke shekemgi hám baslawısh tálim fakultetiniń «Qarekeńniń qızları» komandası 2-orın, Anıq pánler fakultetiniń «APAN» hám Filologiya fakultetiniń «Interfak» komandaları sıylı 3-orındı iyeledi.

Jeńimpazlar hám sıylı orın iyelerine diplom jáne qımbat bahalı sıylıqlar tapsırıldı.

Tańlawda ayrıqsha qábiletlerin kórsete alǵan Anıq pánler fakultetiniń «APAN» komandası aǵzası Maqsat Bazarbaev «Eń shoq jigit», Filologiya fakultetiniń «Interfak» komandası aǵzası Nilufar Tilewmuratova «Eń shoq qız» nominaciyasınıń jeńimpazı dep tabıldı.

Tańlaw juwmaǵında tóreshiler quramı aǵzaları, instituttıń «Turan» komandasınıń veteran aǵzaları sózge shıǵıp, barlıq qatnasıwshılarǵa minnetdarshılıq bildirdi hám aldaǵı oqıwlarında, usınday tańlawlarda joqarı nátiyjelerge erisiwin tiledi.

«Quwnaqlar hám ziyrekler» tańlawınıń final basqıshı usınday joqarı notada óz juwmaǵına jetti.

NMPI baspasóz xızmeti.