Búgin, 25-aprel kúni Ájiniyaz atındaǵı Nókis mámleketlik pedagogikalıq institutında ulıwma bilim beriw mektepleriniń pitkeriwshi klass oqıwshıları arasında matematika boyınsha II Gubkin pán olimpiadası bolıp ótti.

Olimpiada I.M.Gubkin atındaǵı Rossiya mámleketlik neft hám gaz universitetiniń Tashkent qalasındaǵı filialı tárepinen shólkemlestirilgen bolıp, respublika boylap qábiletli jaslardı anıqlaw, olardıń intellektual potencialın rawajlandırıw, mektep hám joqarı bilimlendiriw sisteması arasındaǵı birge islesiwdi bekkemlewge xızmet etedi.

Pán olimpiadası bir waqıttıń ózinde eki aymaqta – Nókis hám Tashkent qalalarında ótkerildi.

Saltanatlı ashılıw máresimi eki qala arasındaǵı onlayn videokonferenciyalıq baylanıs arqalı ótkerildi. Onda universitetittiń Tashkent qalasındaǵı filialı atqarıwshı direktorı Abdulla Magrupov, Qaraqalpaqstan Respublikası Mektepke shekemgi hám mektep bilimlendiriwi ministriniń birinshi orınbasarı Aybek Dáwletbaev, institut rektorı w.w.a. Quvondiq Qodirov sózge shıǵıp, barlıq qatnasıwshılarǵa áwmet tiledi.

Ilaj sheńberinde rus tili páni boyınsha ótkerilgen pán olimpiadasınıń jeńimpazları bolǵan oqıwshı-jaslarǵa universitetke mámleketlik grant tiykarında oqıwǵa qabıl etilgeni haqqındaǵı sertifikatlar tapsırıldı.

Ashılıw máresiminen soń qatnasıwshılar matematika páninen olimpiada tapsırmaların orınlawǵa kiristi.

Olimpiada shártlerine bola, jeńimpazlar hám sıylı orın iyeleri universitet sertifikatları menen sıylıqlanadı jáne olarǵa imtixanlarsız oqıw imkaniyatı beriledi.

Sonday-aq, joqarı nátiyje kórsetken qatnasıwshılar toplaǵan balların kiriw imtixanları nátiyjesi sıpatında esaplatıw imkaniyatına iye boladı.

NMPI baspasóz xızmeti.