Ájiniyaz atındaǵı Nókis mámleketlik pedagogikalıq institutında Ózbekstan Qaharmanı, Ózbekstan hám Qaraqalpaqstan xalıq shayırı Ibrayım Yusupovtıń tuwılǵanına 97 jıl tolıwına arnalǵan «Watan – maǵan, men – Watanǵa kerekpen» atamasındaǵı respublikalıq ilimiy-ámeliy konferenciya bolıp ótti.

Konferenciyaǵa Ózbekstan xalıq jazıwshısı, Qaraqalpaqstan Jazıwshılar awqamınıń baslıǵı K.Kárimov, Qaraqalpaqstan xalıq shayırı G.Dáwletova, belgili shayırlar J.Óteniyazov, G.Nurlepesova, institut professor-oqıtıwshıları, student-jaslar qatnastı.

Ilajda sózge shıqqanlar hám bayanatshılar Ibrayım Yusupovtıń ómiri, dóretiwshiliginiń ózine tán ózgeshelikleri, shıǵarmalarınıń tek ǵana qaraqalpaq ádebiyatı emes, sonıń menen birge, dúnya xalıqları arasında súyip oqılıp atırǵanı, qosıqları, poemaların qayta baspadan shıǵarıw, dúnya tillerine awdarıw, shayırdıń atın máńgilestiriw maqsetinde ámelge asırılıp atırǵan jumıslar haqqında maǵlıwmatlar berdi.

Konferenciya qaraqalpaq tili hám ádebiyatı tálim baǵdarınıń 2-kurs studentleri arasında «Ibrayım Yusupov shıǵarmalarınıń bilimdanı» tańlawı menen dawam etti.

NMPI baspasóz xızmeti.