Búgin, 12-may kúni Ájiniyaz atındaǵı Nókis mámleketlik pedagogikalıq institutında Qaraqalpaqstan Respublikasındaǵı ámelge asırılıp atırǵan keń kólemli reformalardıń mazmunı hám áhmiyetin úgit-násiyatlaw, jaslar arasında óz ara doslıq, awızbirshilik qatnasıqların bekkemlew maqsetinde Tashkent qalası hám wálayatlardaǵı joqarı oqıw orınlarınan kelgen 400 ge shamalas student-jaslar saltanatlı túrde kútip alındı.

Usı múnásibet penen institutta «Doslıq festivalı» shólkemlestirildi hám onıń ashılıw máresimi bolıp ótti.

Ilajda institut rektorı w.w.a. Quvondiq Qodirov sózge shıǵıp, festival qatnasıwshıların elimizge, sonıń ishinde, respublikamızdaǵı tuńǵısh joqarı oqıw ornı esaplanǵan pedagogikalıq institutqa saparı menen qutlıqladı.

Óz gezeginde, miyman joqarı oqıw orınlarınıń wákilleri shıǵıp sóylep, joqarı dárejedegi shólkemlestiriwshilik ushın minnetdarshılıq bildirdi.

Saltanatlı ilaj instituttıń «Tumaris» xalıq ansambli hám talantlı studentleri atqarıwındaǵı kórkem bólim menen dawam etti.

Esletip ótemiz, institutta 12-14-may kúnleri aralıǵında «Doslıq festivalı» sheńberinde óz ara sáwbetlesiwler, mádeniy-aǵartıwshılıq ilajları ótkeriliwi belgilengen.

NMPI baspasóz xızmeti.