Ájiniyaz atındaǵı Nókis mámleketlik pedagogikalıq institutında matematika boyınsha Qaraqalpaqstan Respublikasındaǵı joqarı oqıw orınları studentleri arasında ashıq pán olimpiadası joqarı dárejede shólkemlestirildi.

Bul pán olimpiadasına respublikamızdaǵı joqarı oqıw orınlarında bilim alıp atırǵan 400 ge shamalas qábiletli student-jaslar qatnasıp, óz bilim hám potencialın sınaqtan ótkerdi. Olimpiada eki kategoriya boyınsha ótkerildi.

«A» kategoriyasında matematika, ámeliy matematika, informatika hám kompyuter texnologiyaları tálim baǵdarlarınıń studentleri qatnasıp, olarǵa joqarı matematika páninen 5 jazba soraw berildi. «B» kategoriyasında bolsa basqa tálim baǵdarlarında oqıp atırǵan studentler 20 jabıq test sorawları arqalı óz bilimlerin kórsetiwge háreket etti.

Qatnasıwshılarǵa tapsırmalardı orınlaw ushın 4 saat waqıt ajıratıldı. Olimpiada processleri ashıq-aydın hám ádil túrde ótkerilip, studentler arasında salamat báseki ortalıǵı jaratıldı.

Pán olimpiadası juwmaqları boyınsha jeńimpazlar hám sıylı orın iyeleri diplom jáne qımbat bahalı sawǵalar menen sıylıqlanadı.

Bul pán olimpiadası student-jaslardıń matematika pánine bolǵan qızıǵıwshılıǵın arttırıw, olardıń intellektual potencialın qollap-quwatlaw hám joqarı oqıw orınları arasında ilimiy birge islesiwdi bekkemlewge xızmet etedi.

NMPI baspasóz xızmeti.