1-iyun – Xalıqaralıq balalardı qorǵaw kúni múnásibeti menen Ájiniyaz atındaǵı Nókis mámleketlik pedagogikalıq institutı rektorı w.a. Quvondiq Qodirov hám tiyisli juwapkerler Taqıyatas rayonındaǵı shańaraqlıq balalar úylerinde tárbiyalanıp atırǵan balalardıń halınan xabar aldı.

Ilaj dawamında rayondaǵı «Taqıyatas» hám «Oraylıq» mákan puqaralar jıyınları aymaǵındaǵı Bekzod Saparov hám Dildora Jabbarbergenova, Allabay Ganiev hám Júzimgúl Arzimova, sonday-aq, Zulfiya Matjanovalardıń shańaraqlarında tárbiyalanıp atırǵan balalar ushın bayram sawǵaları tapsırıldı.

Ushırasıwda balalardıń qızıǵıwshılıqları, bilim alıwı hám bos waqıtların mazmunlı shólkemlestiriw máselelerine ayrıqsha dıqqat qaratıldı.

Rektor w.a. Quvondiq Qodirov balalarǵa eń jaqsı tileklerin bildirip, olardıń hár tárepleme kámil insan bolıp jetisiwi, zamanagóy bilim hám kónlikpelerdi iyelewi ushın elimizde jaratılıp atırǵan sharayatlar haqqında sóz etti. Sonday-aq, mehir hám itibar hár bir balanıń baxıtlı keleshegin támiyinlewde áhmiyetli faktor ekenligi atap ótildi.

Ilaj balalarǵa kóterińki keypiyat hám bir dúnya quwanısh inám etti.

NMPI baspasóz xızmeti.