Usı jıldıń 7-12-iyun kúnleri aralıǵında Samarqand qalasında xalıqaralıq «VoiceUP» inklyuziv jaslar lageri qızǵın túrde dawam etpekte.

Xalıqaralıq lagerge Rossiya, Túrkiya, Ázerbayjan, Qazaqstan, Tájikstan, Túrkmenstan hám Qırǵızstan sıyaqlı mámleketlerden kelgen belsendi jaslar qatnaspaqta.

Áhmiyetlisi, olar arasında Ájiniyaz atındaǵı Nókis mámleketlik pedagogikalıq institutı Tábiyiy pánler fakulteti biologiya tálim baǵdarınıń 3-kurs studenti Kúmisay Qızılbaeva, Tariyx fakulteti tariyx tálim baǵdarınıń 3-kurs studenti Jasurbek Nurullaev, Filologiya fakulteti inglis tili hám ádebiyatı tálim baǵdarınıń 3-kurs studenti Alfiya Amangeldieva shólkemlestirilip atırǵan seminarlarda xalıqaralıq ekspertlerdiń prezentaciyalarına qatnasıp, áhmiyetli temalar boyınsha óz bilim hám tájiriybesin arttırmaqta.

Atap aytqanda, balalar kámbaǵallıǵın qısqartıw hám «sociallıq lift» mexanizmleri, ayrıqsha mútájligi bolǵan balalar ushın inklyuziv ortalıq jaratıw, jas óspirimlerdi qáwipli ortalıqtan imkaniyatlarǵa qaray baǵdarlaw, volontyorlıq hám jámiyetshilik qatnastıń áhmiyeti sıyaqlı máseleler dodalanbaqta.

NMPI baspasóz xızmeti.