Samarqand qalasında «Voice UP» joybarı sheńberinde «Shegaralarsız volontyorlıq: tájiriybe, birge islesiw hám jańa baslamalar» atamasındaǵı xalıqaralıq pikirlesiw maydanı bolıp ótti.

Ilajǵa Ázerbayjan, Qazaqstan, Qırǵızstan, Tájikstan, Túrkmenstan hám Ózbekstan wákilleri, sonday-aq, Rossiya hám Túrkiya wákilleri xalıqaralıq ekspert sıpatında qatnastı.

Pikirlesiw dawamında qatnasıwshılar inklyuziv, ekologiyalıq hám korporativlik volontyorlıq baǵdarlarındaǵı aldınǵı tájiriybeler hám jańa baslamalardı usınıs etti.

Áhmiyetlisi, bul ilajda Ájiniyaz atındaǵı Nókis mámleketlik pedagogikalıq institutı Tariyx fakulteti tariyx tálim baǵdarınıń 3-kurs studenti Jasurbek Nurullaev balalar huqıqların qorǵawǵa arnalǵan «BHH» joybarın usınıs etti.

Sonday-aq, instituttıń Filologiya fakulteti inglis tili hám ádebiyatı tálim baǵdarınıń 3-kurs studenti Alfiya Amangeldieva «Voice UP» joybarında inklyuziv jámiyetti rawajlandırıwǵa baǵdarlanǵan joybarın tanıstırdı.

Atap ótilgenindey, bunday ilajlar óz ara tájiriybe almasıw, jas liderlerdi tayarlaw hám xalıqaralıq joybarlardı ámelge asırıw ushın áhmiyetli platforma wazıypasın atqaradı.

NMPI baspasóz xızmeti.