Jizzaq mámleketlik pedagogikalıq universitetinde Ájiniyaz atındaǵı Nókis mámleketlik pedagogikalıq institutı student-jasları qatnasıwında «Biz – bir shańaraq perzentlerimiz!» súreni tiykarında «Doslıq festivalı» shólkemlestirildi.

Festivaldıń dáslepki kúni jaslar universitette bilim alıw, ilimiy izleniwler alıp barıw hám bos waqtın mazmunlı shólkemlestiriw ushın jaratılǵan zamanagóy sharayatlar menen jaqınnan tanıstı. Sonday-aq, repressiya qurbanları esteligi muzeyinde bolıp, xalqımızdıń quramalı tariyxıy dáwirleri hám ata-babalarımızdıń ómiri haqqında áhmiyetli maǵlıwmatlarǵa iye boldı.

Festival sheńberinde eki joqarı oqıw ornı Jaslar awqamı baslanǵısh shólkemleri arasında birge islesiw memorandumına qol qoyılıwı jaslar arasındaǵı doslıq qatnasıqların bunnan bılay da bekkemlew, óz ara tájiriybe almasıw hám aldaǵı birgeliktegi joybarlar ushın áhmiyetli qádem boldı.

Ilajlar dawamında shólkemlestirilgen viktorinalar, «Zakovat» intellektual oyını, mini futbol boyınsha doslıq jarısı, dóretiwshi hám qábiletli studentler qatnasıwındaǵı koncert baǵdarlamaları jáne basqa mádeniy-aǵartıwshılıq ilajlar jaslarǵa umıtılmas tásirler inám etti.

«Doslıq festivalı» eki joqarı oqıw ornı jasların birlestiriw menen birge milletler aralıq tatıwlıq, óz ara húrmet hám awızbirshilik sıyaqlı joqarı qádiriyatlardı ele de bekkemlewge xızmet etti.

NMPI baspasóz xızmeti.